Իսրայելի պաշտպանության նախարարը հայտնել է, որ այսուհետ «Հեզբոլլահ»-ի ղեկավարն իրենց համար ոչնչացման թիրախ է

Իսրայելի պաշտպանության նախարար Իսրայել Կացը հայտարարել է, որ արմատական «Հեզբոլլահ» շարժման գլխավոր քարտուղար Նաիմ Քասեմը այսուհետ վերածվել է իրենց համար ոչնչացման թիրախի։ Ինչպես հաղորդում է «Արմենպրես»-ը, այս մասին նա գրառում է կատարել X-ում։

«Հեզբոլլահ» ահաբեկչական կազմակերպությունը բարձր գին կվճարի Իսրայելի ուղղությամբ կրակոցների համար, և Նաիմ Կասեմը՝ «Հեզբոլլահ»-ի գլխավոր քարտուղարը, որը կրակոցներ արձակելու որոշում կայացրեց Իրանի ճնշման տակ, այսուհետ ոչնչացման թիրախ է», - գրել է Կացը։

Նա հայտարարել է, որ Իսրայելն ամեն գնով պաշտպանելու է իր քաղաքացիներին։ «Հեզբոլլահ»-ը մարտի 2-ին իսրայելական կողմի դեմ կրակ է բացել ՝ ի պատասխան Իրանի գերագույն առաջնորդ այաթոլլա Ալի Խամենեիի սպանության և «Իսրայելի շարունակվող ագրեսիաների»։

Ի պատասխան դրա՝ Իսրայելը հարձակումներ է իրականացրել Լիբանանի տարբեր հատվածներում, ինչի հետևանքով զոհվել է 31 մարդ,  վիրավորվել՝ 149-ը։