Մարդու իրավունքները շատ հաճախ գործիք են դառնում քաղաքական դերակատարների ձեռքում. ՀՀ ՄԻՊ-ը՝ նախընտրական շրջանի մասին

Հայաստանի Հանրապետության մարդու իրավունքների պաշտպան Անահիտ Մանասյանի կանխատեսմամբ՝ ընթացիկ տարում Հայաստանում կայանալիք խորհրդարանական ընտրություններին նախորդող շրջանում խոսքի ազատության իրացման հետ կապված խնդիրները շատ ավելի բացահայտ են դառնալու։ «Արմենպրես»-ի հաղորդմամբ՝ այս մասին Անահիտ Մանասյանը նշեց Եվրոպայի խորհրդի «Խոսքի և մամուլի ազատության և տեղեկատվության հասանելիության խթանումը Հայաստանում» ծրագրի մեկնարկն ազդարարող միջոցառմանն ունեցած ելույթի ընթացքում։

«Բոլորիս համար էլ ակնհայտ է, որ խոսքի ազատությունը, միանշանակ, մարդու կարևորագույն իրավունքներից է, որը ցանկացած ժողովրդավարական հասարակությունում պետք է երաշխավորված լինի։ Խոսքի ազատությունը, միաժամանակ, ունի բովանդակային մի շարք ստանդարտներ, հստակ սահմաններ, որոնք յուրաքանչյուրիս կողմից պետք է ապահովված լինեն։ Այստեղ է, որ բազմաթիվ իրավիճակներում ամբողջ աշխարհում և հատկապես մեր տիպի պետություններում գործ ենք ունենում բազում խնդիրների հետ, որոնք խոսքի ազատության և ոչ իրավաչափ խոսքի տեսակների՝ մասնավորապես, օրինակ, ատելության խոսքի, ապատեղեկատվության և այլ համատեքստերում, վնաս են հասցնում ոչ թե պարզապես անհատների կամ առանձին դերակատարների, այլ հենց մարդու իրավունքների ամբողջ համակարգին»,-ընդգծեց Անահիտ Մանասյանը։

ՄԻՊ-ի խոսքով՝ Եվրոպայի խորհրդի «Խոսքի և մամուլի ազատության և տեղեկատվության հասանելիության խթանումը Հայաստանում» ծրագիրը սկսվում է մի կարևորագույն ժամանակահատվածում, երբ ՀՀ-ում այս տարվա հունիսին տեղի են ունենալու նաև համապետական ընտրություններ ու ակնհայտ է, որ խոսքի ազատության իրացման հետ կապված խնդիրները շատ ավելի բացահայտ են դառնալու։

Մանասյանի դիտարկմամբ՝ պետությունը, միանշանակ, պետք է ապահովի տեղեկատվության հասանելիությունը, խոսքի ազատությունը, լրագրողների անվտանգությունը և մեդիայի ազատությունը։

«Պետք է, միաժամանակ, խոսքի ազատության սահմանները պահպանված լինեն յուրաքանչյուր դերակատարի կողմից։ Այս տեսանկյունից կցանկանամ շեշտադրել, որ մեր տիպի պետություններում մարդու իրավունքները շատ հաճախ գործիք են դառնում քաղաքական դերակատարների ձեռքում՝ օգտագործվելով ամենախոցելի հանգամանքներ։ Հայաստանում հատկապես տեսանելի է մարդու իրավունքների շատ զգայուն թեմաների գործիքայնացումը ընտրություններին նախորդող շրջանում»,-շեշտեց ՄԻՊ-ը։

Մանասյանն իր խոսքում առանձնացրեց նաև հանգամանքը, որ նախընտրական շրջանում քաղաքական տաբեր դերակատարների կողմից, ցավալիորեն, գործիքայնացվում են նաև հաշմանդամություն ունեցող անձինք և նրանց համար զգայուն հանգամանքները։ Բացի այդ, ՀՀ ՄԻՊ-ը նշեց նաև նախընտրական շրջանում հաճախ ատելության խոսքի օգտագործումը, ազգային պատկանելիությունը և այլն։

«Վստահ եմ, որ մեր բոլորի հանձնառության պարագայում հնարավոր կլինի առնվազն պատշաճ հակազդել այս երևույթներին, որովհետև այս բոլոր թեմաների մասին խոսելիս մեզնից յուրաքանչյուրն ամենօրյա ռեժիմով թիրախավորվում է»,-ասաց Անահիտ Մանասյանը։

Նա համոզմունք հայտնեց, որ Եվրոպայի խորհուրդը բացառիկ դերակատարություն ունի Հայաստանում ժողովրդավարության և մարդու իրավունքների ստանդարտների ամրապնդման հարցում։ «Խոսքի և մամուլի ազատության և տեղեկատվության հասանելիության խթանումը Հայաստանում» ծրագրի մեկնարկի միջոցառմանը ներկայացվեցին ծրագրի նպատակները, պլանավորվող գործողությունները և սպասվող արդյունքները, ինչպես նաև կքննարկվեն հաջորդ քայլերը գործընկերների և շահառուների հետ։

Միջոցառումը միավորում է հիմնական շահագրգիռ կողմերին, այդ թվում՝ պետական կառույցների, լրատվամիջոցների և քաղաքացիական հասարակության կազմակերպությունների ներկայացուցիչներին։