ԱՄՆ փոխնախագահ Ջեյմս Դեյվիդ Վենսի այցը Հայաստան և Ադրբեջան․ խաղաղության գործընթաց, TRIPP և ամերիկյան նոր ներգրավվածություն

ԱՄՆ փոխնախագահ Ջեյ Դի Վենսն առաջիկա օրերին կայցելի  Հայաստան և Ադրբեջան ։ Ըստ լրատվամիջոցների՝ նա Երևանում կլինի փետրվարի 9-ին։  Հայտնի է, որ ամերիկյան  բարձրաստիճան պաշտոնյան տարածաշրջան կժամանի Միլանում ձմեռային Օլիմպիական խաղերի բացման արարողությանը մասնակցելուց հետո։

Վենսի այցի մասին առաջինը տեղեկացրել էր Սպիտակ տան ղեկավարը հունվարի 24-ին՝ ասելով, որ այցի նպատակը  TRIPP-ի նախագիծն առաջ մղելն է։ Փորձագետները համոզված են, որ ԱՄՆ փոխնախագահի այցով ծրագիրը գործնական փուլ է մտնում։ Այցն, ըստ նրանց, վկայում է նաև, որ Վաշինգտոնը  շարժվում է տարածաշրջանում իր դերակատարություննամրապնդելու ուղղությամբ։

ԱՄՆ փոխնախագահ Ջեյմս Դեյվիդ Վենսն իր միջազգային ուղևորությունը սկսել է Իտալիայից՝ Միլանում մասնակցելով Ձմեռային օլիմպիական խաղերի բացման արարողությանը, սակայն այցի քաղաքական առանցքը Հարավային Կովկասն է։ AP-ն ծավալուն հոդվածով անդրադարձել է Վենսի այցին՝ ընդգծելով Հարավային Կովկասի կարևորությունը։ Հոդվածում մասնավորապես նշվում է.    

«Օլիմպիական խաղերից հետո Վենսը նախատեսում է մեկնել Հայաստան և Ադրբեջան։ Դոնալդ Թրամփը նրան հանձնարարել է առաջ մղել այն գործընթացը, որի նպատակն է վերջ դնել երկու երկրների միջև գրեթե չորս տասնամյակ շարունակվող հակամարտությանը»։

Ըստ AP-ի՝ խաղաղության համաձայնագիրը Միացյալ Նահանգներին հնարավորություն է տալիս ամրապնդելու դիրքերը տարածաշրջանում Ռուսաստանի նվազող ազդեցության պայմաններում։ Գործակալության գնահատմամբ՝ առանցքային կետերից են տրանսպորտային հաղորդակցության վերագործարկումը և ԱՄՆ-ի հետ գործակցության ընդլայնումը էներգետիկայի ու տեխնոլոգիաների ոլորտներում։