Ինդոնեզիան անվտանգության վերաբերյալ համաձայնագիր է ստորագրել Ավստրալիայի հետ

Ինդոնեզիայի նախագահ Պրաբովո Սուբիանտոն Ջակարտայում Ավստրալիայի վարչապետ Էնթոնի Ալբանիզի հետ հանդիպումից հետո հայտարարել է, որ երկու երկրները փետրվարի 6-ին ստորագրել են անվտանգության մասին համաձայնագիր, որը պարտավորեցնում է նրանց խորհրդակցել միմյանց հետ, եթե երկրներից որևէ մեկը սպառնալիքի տակ լինի։ «Արմենպրես»-ի փոխանցմամբ՝ այս մասին հաղորդում է Reuters-ը։

Համաձայնագրի մասին, որի մանրամասները դեռևս չեն հրապարակվել, առաջին անգամ հայտարարվել է 2025 թ. նոյեմբերին, երբ Պրաբովոն այցելել էր Ավստրալիա։ «Այս համաձայնագիրը ցույց է տալիս, որ Ավստրալիայի և Ինդոնեզիայի հարաբերություններն ամուր են ավելի, քան երբևէ»,- Ջակարտայում ասել է Ալբանիզը։

Պրաբովոն իր հերթին նշել է, որ համաձայնագիրն արտացոլում է երկու երկրների միջև հարաբերությունները։ «Ինդոնեզիային և Ավստրալիային վիճակված է ապրել կողք-կողքի, և մենք որոշել ենք այդ հարաբերությունները կառուցել վստահության և բարի մտադրությունների հիմքերի վրա», - ասել է նա։

Ավստրալիայի արտաքին գործերի նախարար Փենի Վոնգը հայտարարել է, որ ստորագրված համաձայնագիրը կազմվել է երկու երկրների միջև 1995 թվականի անվտանգության մասին համաձայնագրի օրինակով։

1995 թվականի համաձայնագիրը չեղյալ է հայտարարվել 1999 թվականին այն բանից հետո, երբ Ավստրալիան գլխավորեց ՄԱԿ-ի խաղաղապահ ուժերն Արևելյան Թիմորում, որտեղ բռնություններ էին սկսվել Ինդոնեզիայից անկախություն ձեռք բերելու ձգտման ժամանակ։