Ռուսական հարվածի պատճառով Խարկովում ավելի քան 820 բնակելի շենք է մնացել առանց ջեռուցման` 20-աստիճան ցրտին

Փետրվարի 3-ի գիշերը ռուսական զինուժը անօդաչու թռչող սարքերով և բալիստիկ հրթիռներով հարձակվել է Ուկրաինայի մեծությամբ երկրորդ քաղաքի՝ Խարկովի էներգետիկ ենթակառուցվածքների վրա։ «Նպատակն ակնհայտ է՝ հասցնել առավելագույն ավերածություններ և քաղաքը թողնել առանց ջեռուցման՝ ուժեղ սառնամանիքի պայմաններում»,- տելեգրամյան ալիքում գրել է քաղաքապետ Իգոր Տերեխովը։ Նրա խոսքով՝ քաղաքային իշխանությունները ստիպված կլինեն դատարկել ջեռուցման համակարգի ջուրը 820 բազմաբնակարան շենքերում, որպեսզի թույլ չտան ցանցի սառցակալումը։

«Ես հասկանում եմ, թե որքան ծանր է դա 20 աստիճան ցրտին։ Բայց թշնամու աննախադեպ հարձակումը կրիտիկական ենթակառուցվածքների վրա այլ տարբերակ չի թողնում։ Մեր մասնագետները այլ ելք չեն տեսնում»,- նշել է Տերեխովը։ Խարկովի քաղաքապետը հավելել է, որ քաղաքում շուրջօրյա կգործի 101 «անհաղթելիության կետ», իսկ անհրաժեշտության դեպքում իշխանությունները կբացեն նորերը։ Անցած գիշեր Խարկովում ջերմաչափի սյունը իջել էր մինչև -24°C: Ցերեկը սպասվում է ջերմաստիճանի բարձրացում մինչև -15°C:

Փետրվարի 3-ի գիշերը ռուսական անօդաչու թռչող սարքերի և բալիստիկ հրթիռների հարվածների տակ է հայտնվել նաև Կիևը: Քաղաքային ռազմական վարչակազմի ղեկավար Տիմուր Տկաչենկոյի տվյալներով՝ միջադեպեր են գրանցվել հինգ շրջաններում։ Շևչենկովսկի շրջանում վնասվել է 22-հարկանի բնակելի շենք, կա երկու տուժած, իսկ Դնեպրովսկի շրջանում՝ հնգահարկ բնակելի շենք։ Ուկրաինայի մայրաքաղաքի բնակիչները հայտնում են, որ քաղաքում կրկին անհետանում է ջեռուցումը, որը բոլոր շրջաններում գրեթե վերականգնվել էր էներգետիկայի վրա նախորդ զանգվածային հարվածներից հետո։ Կիևում գիշերը ջերմաստիճանը եղել է -19°C, իսկ ցերեկը սպասվում է մինչև -13°C:

Ռուսաստանը վերսկսել է հարձակումները Ուկրաինայի էներգետիկ ենթակառուցվածքների վրա նախօրեին՝ փետրվարի 2-ին, այն բանից հետո, երբ լրացել է «զինադադարի» ժամկետը, որի մասին ԱՄՆ նախագահ Դոնալդ Թրամփը խնդրել էր Վլադիմիր Պուտինին։ Արդյունքում առանց էլեկտրամատակարարման են մնացել Խարկովի, Սումիի, Դնեպրոպետրովսկի և Չերկասիի մարզերի բնակիչները։ Կիևում և Կիևի մարզում պահպանվում է հզորությունների դեֆիցիտը։