Դեմոկրատ սենատորները կներկայացնեն օրենսդրություն՝ Թրամփի մաքսատուրքերը արգելափակելու համար

ԱՄՆ Սենատում դեմոկրատները մտադիր են օրինագիծ ներկայացնել՝ Դանիայի և մի քանի այլ եվրոպական երկրների նկատմամբ ԱՄՆ նախագահ Դոնալդ Թրամփի հայտարարած նոր մաքսատուրքերը արգելափակելու համար, նշված է Սենատի դեմոկրատ փոքրամասնության առաջնորդ Չակ Շումերի հունվարի 17-ին հրապարակված գրավոր հայտարարության մեջ։

«Դոնալդ Թրամփի անխոհեմ մաքսատուրքերն արդեն բարձրացրել են գները և վնասել մեր տնտեսությունը, և հիմա նա ավելի է վատթարացնում իրավիճակը», - ասել է Շումերը, հավելելով, որ մաքսատուրքեր են սահմանվելու ԱՄՆ ամենամոտ դաշնակիցների նկատմամբ՝ «Գրենլանդիան զավթելու Թրամփի անիրատեսական ծրագրի համար»։

«Դեմոկրատ սենատորները կներկայացնեն օրենսդրություն՝ այս մաքսատուրքերը արգելափակելու համար, քանի դեռ դրանք ավելի մեծ վնաս չեն հասցրել ամերիկյան տնտեսությանը և Եվրոպայում մեր դաշնակիցներին », — ընդգծել է Շումերը։

Հունվարի 17-ին Թրամփը TruthSocial սոցիալական ցանցում գրել էր, որ Միացյալ Նահանգները 10% մաքսատուրք կսահմանի Մեծ Բրիտանիայի, Գերմանիայի, Դանիայի, Նիդեռլանդների, Նորվեգիայի, Ֆինլանդիայի, Ֆրանսիայի և Շվեդիայի նկատմամբ, որը կմնա ուժի մեջ մինչև կողմերը Գրենլանդիայի հարցում համաձայնության գան:

Այս որոշումն ուժի մեջ կմտնի փետրվարի 1-ից, իսկ հունիսի 1-ին մաքսատուրքի դրույքաչափը կաճի մինչև 25%:

ԱՄՆ նախագահը քննադատել էր Գրենլանդիա զինված ուժեր ուղարկելու Եվրոպական երկրների մտադրությունը՝ այն անվանելով «շատ վտանգավոր խաղ»:

Թրամփը նաև հայտարարել էր, որ Գրենլանդիան ԱՄՆ-ին անհրաժեշտ է ազգային անվտանգությունն ամրապնդելու և ամերիկյան «Ոսկե գմբեթ» հակահրթիռային պաշտպանության համակարգի արդյունավետ տեղակայման համար։

Գրենլանդիան Դանիայի կազմում ինքնավար տարածք է: 1951 թվականին Վաշինգտոնը և Կոպենհագենը, ՆԱՏՕ-ում իրենց դաշինքային պարտավորություններից բացի, ստորագրել են Գրենլանդիայի պաշտպանության մասին պայմանագիր: Դրա համաձայն՝ Միացյալ Նահանգները պարտավորվել է պաշտպանել կղզին հնարավոր ագրեսիայից: