Շնորհակալություն եմ հայտնում Թուրքիայի ԱԳ նախարարին. նրա խոսքը սխալ է թարգմանվել. Ալեն Սիմոնյան

Նման բան չի ասվել, տարաշրջանային զարգացումներից դուրս մնալը, տարածաշրջանի մեջ ներգրավված լինելը, հիբրիդային պատերազմը տարբեր բաներ են: Այն, որ մենք տարածաշրջանում մեր գործընկերների հետ կապված աշխատում ենք ու լավ հայտարարություններ ենք անում Թուրքիայի, Իրանի, Վրաստանի հետ կապված, դա՞ էլ է համարվում միջամտություն իրենց երկրին: Այս մասին ճեպազրույցի ժամանակ ասաց ԱԺ նախագահ Ալեն Սիմոնյանը՝ անդրադառնալով Թուրքիայի արտգործնախարարի հայտարարություներին:

«Պրոպագանդայի ներկայացուցիչները Հայաստանում տարբեր պրոցեսներ հրահրելու հետ կապված հայտարարություններ են անում ու միջամտում են, քաղաքական ուժերի հետ անմիջական աշխատում են»,- նշեց նա:

Այնուհետև Ալեն Սիմոնյանը լրագրողին խնդրեց ընթերցել Թուրքիայի արտգործնախարարի հայտարարությունը, որի շուրջ քննարկումներ են զարգացել: Ընթերցելուց հետո՝ կարծիք հայտնեց, որ վերջինս բառացի ասել է այն մասին, որ հանրությունը աջակցում է այն գործընթացին, որը գործող իշխանությունը տանում է առաջ, վերջինիս անձնական աջակցության մասին այդ հայտարարության մեջ չկա:

«Դուք Ֆիդանին սխալ եք թարգմանել: Սա է ձեր լրատվության մեկնաբանության որակը: Սա է այն որակը, որով դուք փորձում եք մանիպուլիացիաներ անել»:

Եզրափակելով իր խոսքը՝ Ալեն Սիմոնյանը նշեց, որ կարող են ներկայացնել նաև իր հայտնած շնորհակալությունը. «Շնորհակալություն եմ հայտնում Թուրքիայի արտգործնախարարին և բոլոր այն տարածաշրջանային գործընկերներին, որոնք աջակցում են Հայաստանի Հանրապետության հանրության մեծամասնության խաղաղության գնալու, առևտուր անելու կոչերին»:

Հիշեցնենք, որ երեկ Ֆիդանը հայտարարել էր, որ հունիսի սկզբին Հայաստանում ընտրություններ են անցկացվելու․ Փաշինյանն այժմ առաջատար է հարցումներով, մենք աջակցում ենք նրա կառուցողական դերին այս գործընթացում: