Վենեսուելայի իշխանությունն ու ընդդիմությունը մրցում են Թրամփի համակրանքի համար՝ գրում է El País-ը

Վենեսուելայի ժամանակավոր ղեկավար Դելսի Ռոդրիգեսը և ընդդիմության առաջնորդ Մարիա Կորինա Մաչադոն պայքարում են ԱՄՆ նախագահ Դոնալդ Թրամփի աջակցությունն ու համակրանքը ձեռք բերելու համար։ Այդ մասին գրում է իսպանական El País-ը՝ նշելով, որ երկրի գլխավոր քաղաքական դերակատարները փորձում են համոզել Թրամփին, թե հենց իրենք են առավել հարմար անցումային շրջանի ղեկավարի դերում։

Պարբերականի տվյալներով՝ Մաչադոն հունվարի 15-ին Վաշինգտոնում աշխատանքային ճաշ է նախատեսում Թրամփի հետ։ Միաժամանակ ԱՄՆ-ում գտնվում է Վենեսուելայի նախագահի վստահելի դիվանագետներից մեկը՝ Ֆելիքս Պլասենսիան, որը զբաղված է ամերիկյան վարչակազմի հետ կապերի ամրապնդմամբ։ Նշվում է, որ հենց նա է առանցքային դեր խաղացել այն հարցում, որ վենեսուելական իշխանությունները մի քանի ժամով առաջ անցնեն ընդդիմությունից և կազմակերպեն Թրամփի ու Ռոդրիգեսի հեռախոսազրույցը։

El País-ը գրում է, որ Մաչադոն նույնպես փորձում է չզիջել մրցակցին և Թրամփի հետ շփման ընթացքում անգամ առաջարկել է «կիսվել» իր Նոբելյան խաղաղության մրցանակով։ Ավելի վաղ CNN-ը հայտնել էր, որ Թրամփի վարչակազմի կարճաժամկետ նպատակը Վենեսուելայում նավթի հոսքերը փակելն է ԱՄՆ-ի աշխարհաքաղաքական մրցակիցների՝ Ռուսաստանի, Չինաստանի, Իրանի և Կուբայի համար՝ ապահովելով, որ երկրում առկա նավթը մնա Վենեսուելայի տարածքում։