ԵՄ երկրները ռուսական ակտիվների հարցի շուրջ երկու ճամբարի են բաժանվել․ Politico

ԵՄ երկրները դեռևս միասնական որոշման չեն եկել Ուկրաինայի ֆինանսավորման հարցում՝ դեկտեմբերի 18-19-ին կայանալիք գագաթնաժողովից առաջ։ Երկրների մի մասը կոչ է անում օգտագործել Ռուսաստանի Դաշնության սառեցված ակտիվները, մյուս մասը կողմ է ԵՄ երկրների համատեղ փոխառություններին, հայտնում է Politico-ն։

Որպես հնարավոր փոխզիջում դիտարկվում է մի սխեմա, ըստ որի ֆինանսավորմանը կմասնակցեն ԵՄ 27 երկրներից միայն 25-ը՝ բացառությամբ Հունգարիայի և Սլովակիայի, որոնք դեմ են Ուկրաինային օգնություն տրամադրելուն։

Հունգարիայի վարչապետ Վիկտոր Օրբանը ավելի վաղ հայտարարել է, թե ակտիվների հարցը գագաթնաժողովում չի քննարկվելու, իսկ բանակցություններն անցել են համատեղ վարկերի թեմային։ Սակայն ԵՄ բարձրաստիճան պաշտոնյան Politico-ի հետ զրույցում հերքել է դա՝ հաստատելով, որ ռուսական ռեզերվների տարբերակը մնում է օրակարգում։