Այո, ժողովրդավարությանը պետք է փող և ուժ՝ հիբրիդային հարձակումներից պաշտպանվելու համար. Պապոյանը՝ ԵՄ-ին դիմելու մասին

Հայաստանի Հանրապետության նկատմամբ, իհարկե, հնարավոր է լինեն հիբրիդային հարձակումներ, մասնավորապես մեր ժողովրդավարությունը վտանգի տակ դնեն և տարբեր տեսակի կեղծ լուրերով կամ ընտրակաշառքային մեխանիզմներով փորձ կատարվի որոշակի շրջանակների կողմից, որոնք տիրապետում են միլիարդավոր դոլարների, ազդել ընտրությունների վրա։ Այս մասին, այսօր՝ դեկտեմբերի 15–ին, ԱԺ–ում լրագրողների հետ զրույցում նշեց Էկոնոմիկայի նախարար Գևորգ Պապոյանը՝ անդրադառնալով լուրերին, որ Հայաստանը ԵՄ–ից օգնություն է խնդրել ընտրություններին արտաքին միջամտությունը կանխելու համար։

Հարցին՝ Ռուսաստա՞նն է Հայաստանում հիբրիդային պատերազմ տանում, թե՞ Եվրամիությունը, Պապոյանը պատասխանեց. «Ես որևէ երկրի կամ տարածաշրջանի անուն չտվեցի։ Ցանկացած երկիր կամ տարածաշրջան, ցանկացած անձ՝ կլինի դա նախկին պաշտոնյա, այլ երկրի օլիգարխ, թե որևէ այլ մեկը, եթե նա կփորձի ազդել Հայաստանի Հանրապետության ընտրությունների վրա կեղծիքների, փողի, ընտրակաշառքի, կեղծ լուրեր տարածելու, ընդհանրապես ժողովրդավարության վրա տարբեր հարցակումերով, ես կարծում եմ, որ դա ոչ միայն ժողովրդավարության իրավունքն է, այլ պարտավորությունն է պաշտպանել իրեն և ժողովրդավարությունը։ Դրա համար պետք է ունենա, այո, փող, անհրաժեշտ ուժ, պետք է ունենա գիտելիքներ և անհրաժեշտ ժամանակին գործի կտրուկ և հատուկ»։

Հարցին՝ այդ պայքարում Հայաստանն ունի՞ ԵՄ կարիքը, Պապոյանն ասաց. «Ես կարծում եմ, որ ԵՄ երկրներում ժողովրդավարության փորձը և պատմությունը և տարբեր տեսակի հիբրիդային արձակումներից պաշտպանվելու իրենց հաջողված փորձը կարելի է կիրառել։ Իսկ ո՞վ է ասել, որ եվրոպական երկրներում մի օր որոշել են, որ պետք է լինեն ժողովրդավար, ու բոլորով դարձել են ժողովրդավար։ Բնականաբար, այդ երկրներում այսօր էլ կան ուժեր, որոնք ժողովրդավարությունների վրա հարձակումներ են գործում։ Ժողովրդավարական երկրներին անհրաժեշտ է պաշտպանել ժողովրդավարությունը գիտելիքներով, ուժով և գումարով, որպեսզի պետությունը կարողանա ժողովրդավարությունը պաշտպանել և անհրաժեշտ պահի գործել հատուկ և կտրուկ։

Ժողովրդավարությունը դա նա է, երբ ժողովուրդը ընտրում է իր ուզած իշխանությանը և ժողովրդի ձայնը չի կեղծվում, և այն ուժը, որը ընտրությունների ժամանակ առավելագույն ձայներ է ստանում, ժողովուրդը իրապես ընտրում է այդ ուժին, որ չեն բաժանվում ընտրակաշառքներ, մարդկանց չեն ահաբեկում, չեն ցուցակագրում, ուղարկում ընտրությունների, ժողովրդավարության այդպիսի ընտրություններն են բնորոշ»։

Անդրադառնալով տեղեկություններին, որ Հայաստանում մոլդովական սցենար են պատրաստում, երբ որոշ կուսակցությունների թույլ չեն տա մասնակցել ընտրությունների, Պապոյանն ասաց. «Ես չգիտեմ դա ինչ սցենար է, չեմ կարող մեկնաբանել, որովհետև ես չգիտեմ մոլդովական սցենարն ինչ է»։

Հարցին՝ ո՞րն է այդ եվրոպական փորձը, որ հաջողված է, ՔՊ–ական նախարարն արձագանքեց. «Դե եթե իրենք ստեղծել են ժողովրդավարությունը և պահել են ու շարունակում են պահել, դա ենթադրում է, որ իրենք ունեն որոշակի գիտելիքներ և մեխանիզմներ, որոնք  հնարավորություն են տալիս ժողովրդավարությանը ինքն իրեն պաշտպանել։ Ես ձեզ մի օրինակ բերեմ, երբ Գերմանիայում ժողովրդավարությունը չկարողացավ իրեն պահպանել, դրա արդյունքում, օրինակ, Հիտլերը եկավ իշխանության։