Քաղաքացիների ահազանգերի ընդունման համար այսուհետ կգործարկվի նոր հեռախոսահամար

Քաղաքացիների ահազանգերի ընդունման համար այսուհետ կգործարկվի «112» հեռախոսահամարը, որի ներքո կմիավորվեն ՆԳՆ երկու մարմնի՝ ոստիկանության և փրկարար ծառայության հեռախոսահամարները («1-02», «1-01», «911»)։ ՆԳ փոխնախարար Արմեն Մկրտչյանի խոսքով, մեկ զանգի սպասարկումը կնվազեցվի մինչև 10 վայրկյան, իսկ արձագանքի միջին տևողությունը՝ մինչև 10 րոպե։ Նա նաև նշել է, որ «112» հեռախոսահամարը հիմա էլ է գործում։

Աշխատանքի ու սոցիալական հարցերի նախարար Արսեն Թորոսյանն առաջարկել է «1-02», «1-01» և «911» հեռախոսահամարներն առայժմ չհանել, այլ՝ վերահասցեավորել նոր համարին, եթե դրանք պահելը մեծ ծախսեր չի պահանջում։ Թորոսյանը որպես օրինակ է բերել, որ ԱՄՆ-ում «911» հեռախոսահամարն է տարածված, և այնտեղից եկած քաղաքացին միգուցե չիմանա «112» համարը։

«Մենք դրանք հանելու հստակ ժամկետ չենք նախանշել, մեր պլանն այնպիսին է, որ դրանք հանենք շրջանառությունից, երբ դրանց անհրաժեշտությունը կվերանա»,- մեկնաբանել է փոխնախարարը։

Առողջապահության նախարար Անահիտ Ավանեսյանն էլ ասել է, թե շտապօգնության «1-03» հեռախոսահամարը մնալու է, և ԱՆ ենթակայության շտապօգնության ծառայությունն իր օպերացիոն կետն է ունենալու. «Ծրագրային առումով մենք միասնական հարթակի միջոցով կարողանալու ենք տեղեկատվությունը օնլայն ռեժիմով վայրկյանների ընթացքում փոխանցել»։