Իտալիայում մաֆիայի «բոսերի բոսի» որդուն հարկադիր աշխատանքների են դատապարտել
Սալվատորե «Տոտո» Ռիինայի որդին՝ Ջուզեպե Սալվատորե Ռիինան մեկ տարի կանցկացնի ուղղիչ բանտում, հայտնում է La Repubblica-ն: Պարբերականի տեղեկություններով՝ Ջուզեպե Սալվատորե Ռիինային, ով հանրության համար վտանգավոր է ճանաչվել եւ հսկողության տակ է, կասկածում են մի շարք օրենքներ խախտելու մեջ: Իրավապահները հայտարարում են, որ իտալացի մաֆիոզի որդին, մասնավորապես, շփումներ է ունեցել թմրավաճառների հետ:
Նա խախտել է նաեւ գիշերը տանից չհեռանալու կարգադրությունը: Ջուզեպե Սալվատորե Ռիինան նախկինում դատապարտվել է հանցավոր խմբավորմանն անդամակցելու համար եւ բանտում է անցկացրել գրեթե 9 տարի: Նրա հայրը՝ Սալվատորե «Տոտո» Ռիինան, որը հայտնի է նաեւ Կոզա Նոստրայի «բոսերի բոս» մականունով, 87 տարեկանում մահացել է գրեթե 2 շաբաթ առաջ: Նա մի քանի ցմահ ազատազրկումների էր դատապարտվել բազմաթիվ սպանությունների կազմակերպման համար: