«5165» շարժումը «կարմիր ժապավենների» ակցիա է իրականացրել Երևանի կենտրոնում՝ պահանջելով Փաշինյանի հրաժարականը

«5165»-ը «կարմիր ժապավենների» ակցիա է իրականացրել Երևանի կենտրոնում՝ պահանջելով Նիկոլ Փաշինյանի հրաժարականը։ Նրանք կարմիր ժապավեններ կապելով իրենց թևերին շրջեցին Երևանի կենտրոնում՝ արտահայտելով իրենց դիրքորոշումը և անհամաձայնությունը Նիկոլ Փաշինյանի վարած քաղաքականության և երկրում տիրող իրավիճակի վերաբերյալ։

Մինչ երթը Ազատության հրապարակում շարժման ասուլիսի ժամանակ շարժման անդամ Էդգար Ղազարյանն ասաց. «Արցախն ահազանգում է և Արցախի ժողովուրդը չի դիմում ՀՀ իշխանություններին, այլ դիմում է հայ ժողովրդին՝ կոչ անելով դուրս գալ միասնական պայքարի: Այսօր եկել ենք Ազատության հրապարակ պայքարելու և այդտեղից կգնանք միայն ակցիաներ, բողոքի գործողություններ իրականացնելու համար։

Սա կարմիր ժապավեն է, սա իմ կարմիր գիծն է, որը նիկոլ Փաշինյանն անցել է բոլոր ոլորտներում»:

Նա կոչ արեց, որ յուրաքանչյու քաղաքացի, ով դեմ է Նիկոլ Փաշինյանին, խանութից գնի կարմիր ժապավեն, կապի իր թևին և ամենուր՝ աշխատավայրում, կրթօջախներում քայլեն կամիր ժապավենները կապած:

Ղազարյանը հորդորեց նաև մեքենաների վրա էլ կարմիր ժապավեն կապել. «Սրանով ասում ենք՝ Փաշինյան, դու անցել ես այս կարմիր գիծը, հեռացիր մեր կյանքից»,-ասաց նա հավելելով, որ վաղը կարմիր ժապավեններով ակցիան տեղի կունենա բոլոր ԲՈւՀ-երում և կրկին կվերադառնան Ազատության հրապարակ:

Հիշեցնենք, որ շարժումը գնացել էր Ազատության հրապարակ՝ հայտարարելով, որ «5165» կուսակցությունը ժամանակավորապես դադարեցնում է իր գործունեությունը, համախմբվում է Նիկոլ Փաշինյանի հրաժարականը պահանջելու, նրան հեռացնելու, Արցախը փրկելու և Հայաստանը այս ճգնաժամից փրկելու գաղափարի շուրջ։