Օրերի հարց է, Աշոտ Մինասյանը պետք է լինի ազատության մեջ. Արամ Վարդևանյան

«Հայաստան» խմբակցության պատգամավոր Արամ Վարդևանյանը խորհրդարանում լրագրողների հետ զրույցում արձագանքել է ՀՀ դատախազության հայտարարությանը։ Նա կրկին հայտարարեց՝ Սիսական ջոկատի լեգենդար հրամանատար Աշոտ Մինասյանը դասական իմաստով քաղաքական հետապնդման զոհ է։

Վարդևանյանի հարցին ի պատասխան դատախազությունից հայտնել են, որ նախաքննական նույն մարմնում քննված և 2017-2021թթ. դատարաններում ավարտված 10 անձի վերաբերյալ 10 գործով ՀՀ քրեական օրենսգրքի 235-րդ հոդվածի 1-ին մասով առաջադրված մեղադրանքով կալանքի տակ է գտնվել 9 անձ։

Պատգամավորը հայտնեց՝ խոսքը հարյուրավոր քրեական գործերի մասին է, որոնք հարցուցվել է 235-րդ հոդվածով, իսկ միայն հետպատերազմյան շրջանը դրա համար բավարար է։

«Ստացվում է, Աշոտ Մինասյանն այս հայտարարության արդյունքում դասական իմաստով քաղաքական հետապնդման զոհ է։ Ստացվում է, հազարավոր մարդիկ այս հոդվածով չեն կալանավորվում, բայց Աշոտ Մինասյանը կալանավորվում է։ Զենքը լինի մեկ հատ, թե 10 հատ, նշանակություն չունի այդ հոդվածով, հարցը իրավական է»։

Պատգամավորի կարծիքով, դատախազությունը փորձում է էմոցիա փոխանցել, բայց արցախյան երեք պատերազմներին մասնակցած, դատախազներին պաշտպանած Աշոտ Մինասյանին կալանավորած պահելը, այն էլ ապօրինի՝ դրանից ավելի մեծ էմոցիա առաջացնող հանգամանք չկա։

Պատգամավորը հայտարարեց՝ Աշոտ Մինասյանի նկատմամբ առկա է պրիմիտիվ մեղադրանք։ Մինչև օրս կալանավորված է և սպասում են դատական նիստին, որը տեղի կունենա Սյունիքում։ Վարդևանյանը ցանկանում է մասնակցել նիստին և պատրաստ է ցանկացած կերպով իր օժանդակությունը ցուցաբերել։

«Կարծում եմ՝ բոլոր դեպքերում օրերի հարց է, որ Աշոտ Մինասյանը պետք է լինի ազատության մեջ»։

Հիշեցնենք, որ ավելի վաղ Վարդևանյանը հարցմամբ դիմել էր ՀՀ Դատախազություն, նշելով, որ Սիսական ջոկատի լեգենդար հրամանատար Աշոտ Մինասյանին կալանավորված են պահելու առավելագույնը մինչև երեք տարի ժամկետով ազատազրկում նախատեսող մեղադրանքի շրջանակներում: Հետաքրքրվել էր՝ արդյոք Դատախազությունն ու Գլխավոր դատախազը այլ, ոչ քաղաքական, քրեական գործերով որդեգրել է նման մոտեցում, որ նման ծանրության մեղադրանքներով կալանավորումը պետք է պահպանվի, թե նախապատվությունը տրվում է այլ խափանման միջոցների:

Դատախազությունն էլ ի պատասխան պատգամավորի հարցման, առաջարկել էր Աշոտ Մինասյանի վերաբերյալ կայացված դատական ակտը և մեղադրանքներին անհիմն գնահատականներ չտալ։ Հայտնել էին նաև, որ նույն մեղադրանքով կալանքի տակ գտնված անձանցից որևէ մեկն ապօրինաբար չի պահել այնպիսի հրազեն ու ռազմամթերք, ինչ, ըստ մեղադրանքի, Աշոտ Մինասյանը։