Ռուսաստանը եւ Հայաստանը շատ լուրջ փոխգործակցում են ԵԱՏՄ շրջանակում. Սերգեյ Կոպիրկին

ԵԱՏՄ-ն ապահովել է մասնակից երկրների տնտեսությունների կայուն զարգացում եւ նպաստել մեր քաղաքացիների կյանքի ու բարեկեցության բարելավմանն իր գոյության առաջին 7 տարում։ Այս մասին Եվրասիական փորձագիտական ակումբի 7-րդ ամենամյա նիստի ընթացքում, «ԵԱՏՄ-ն 7 տարեկան է. երեկ, այսօր, վաղը» համաժողովում դեկտեմբերի 15-ին ասաց Հայաստանում Ռուսաստանի Արտակարգ եւ լիազոր դեսպան Սերգեյ Կոպիրկինը։

Դա, նրա խոսքով, արտացոլվում է շատ ցուցանիշներում։ Առաջընթացը, դեսպանի կարծիքով, բավական նշանակալի է։ «Եվրասիական մայրցամաքի տարածքում փոխգործակցությունը ընթանում է տարբեր ձեւաչափերով ու հատուկ նշանակություն ունի։ Այն առավել առաջանցիկ ինտեգրացիոն ձեւաչափ է»,- ընդգծեց դիվանագետը։

Ծառայությունների շուկան, օրինակ, ընդգրկում է 53 սեկտոր։ Բացի այդ, ընդունվել է միասնական Մաքսային օրենսգիրք, ուժի մեջ է մտել կենսաթոշակային ապահովման մասին համաձայնագիրը եւ այլն։ «Ռուսաստանը եւ Հայաստանը շատ լուրջ փոխգործակցում են ԵԱՏՄ շրջանակում։ Հայաստանը մեծ դեր է խաղում ե՛ւ կապերի ընդլայնման, ե՛ւ երրորդ երկրների հետ փոխգործակցության գործում։ Միությանն անդամակցությունից ակնհայտ է նաեւ տնտեսական շահը Հայաստանի համար, ինչը հաստատվում է փոխադարձ առեւտրի աճով։ Նաեւ հայկական արտադրանքի արտահանման ծավալներն են 2021թ. 9 ամսում ապահովել 30 տոկոս աճ։ Ընդ որում՝ աճ է նկատվում ԵԱՏՄ բոլոր գործընկերներ հետ կապերում։ Այդ ցուցանիշը, ի թիվս այլ բաների, ցույց է տալիս նաեւ, որ հանրապետության տնտեսությունը համավարակից հետո սկսել է աստիճանաբար վերականգնվել»,- նշեց Կոպիրկինը։