Ով էլ լինի ՀՀ պաշտպանության նախարարը, մեկ անձի կարգադրություններն ու կամքն է կատարելու. Սեյրան Օհանյան
ՀՀ պաշտպանության նախարարի պաշտոնը քաղաքական պաշտոն է, եւ այն քաղաքական թիմի անդամ պետք է զբաղեցնի, որը կառավարման փորձառություն պետք է ունենա, ինչը նշանակում է, որ տվյալ անձն օրենսդիրում եւ գործադիրում պետք է տիրապետի այն բոլոր աստիճաններին, որոնցով նա աշխատանքային աճ է ունենում եւ աշխատելու փորձ ձեռք բերում: Նման կարծիք NEWS.am-ի հետ զրույցում հայտնեց ՀՀ պաշտպանության նախկին նախարար, ԱԺ ընդդիմադիր «Հայաստան» խմբակցության ղեկավար Սեյրան Օհանյանը՝ անդրադառնալով Արշակ Կարապետյանին զբաղեցրած պաշտոնից ազատելու եւ Սուրեն Պապիկյանին պաշտպանության նախարար նշանակելու վարչապետի որոշումներին:
«2018թ. սկսած քանի անգամ են նման պաշտոններում փոփոխություններ կատարվել, եւ անհաջողությունների հիմքում այդ պաշտոնյաների արագ փոփոխություններն են եղել, ինչը հնարավորություն չի տվել լիարժեք տիրապետել տվյալ անձանց առջեւ դրված ոլորտային խնդիրներին: Մեր պետությունում մեկ անձի կողմից է կառավարումն իրականացվում, կարեւորը կառավարության ղեկավարի պաշտոնն է, որում այժմ Նիկոլ Փաշինյանն է գտնվում, եւ ով էլ լինի պաշտպանության նախարարը, միեւնույնն է՝ մեկ անձի կարգադրություններն ու կամքն է կատարելու, չեմ կարծում, թե շատ կարճ ժամանակում կարող են այդ համակարգում փոփոխություններ կատարվել»,- նշեց Օհանյանը:
Վարչապետ Նիկոլ Փաշինյանն Անվտանգության խորհրդի՝ այսօր հրավիրված նիստում հայտարարել էր, որ Արշակ Կարապետյանին զբաղեցրած պաշտոնից ազատելու որոշում է կայացրել հայ-ադրբեջանական սահմանի արեւելյան ուղղությամբ նախօրեին տեղի ունեցած իրադարձությունների վերլուծության արդյունքում: Հարցին՝ որոնք կարող են լինել պաշտպանության նախարարի պաշտոնանկության պատճառները, Օհանյանը չբացառեց սահմանային առկա լարվածությունը:
«Արշակ Կարապետյանին պաշտոնից ազատելու պատճառների մասին պետք է հարցնել այսօր կառավարության աթոռին նստած անձնավորությանը, որովհետեւ նա է այդ տեղեկատվությանը խորությամբ տիրապետում: Հաշվի առնելով սահմանային առկա լարվածությունը՝ կարծում եմ, որ դա է նաեւ ազդել պաշտպանության նախարարի արագ փոփոխության վրա»,- նկատեց Օհանյանը:
Այս տարվա մայիսի 12-ին ադրբեջանական զորքերը մի քանի ուղղությամբ՝ Գեղարքունիքի եւ Սյունիքի մարզերի տարբեր հատվածներում, ներխուժել էին ՀՀ տարածք, որտեղից մինչ այժմ չեն հեռացել եւ շարունակում են ամրանալ, սակայն այդ ժամանակ պաշտպանության նախարարի պաշտոնից Վաղարշակ Հարությունյանը չէր ազատվել: Այդ դեպքում ինչպե՞ս է ստացվում, որ, ինչպես վարչապետն է հայտարարել, սահմանային իրավիճակը հիմք է հանդիսացել կադրային նման փոփոխություն կատարելու համար: Միաժամանակ, նոյեմբերի 8-ին Արշակ Կարապետյանն այցելել էր Արցախի Հանրապետությունը, ինչը մի քանի ամսվա դադարից հետո ՀՀ բարձրաստիճան պաշտոնյայի մակարդակով առաջին այցն էր, ինչին կոշտ էին արձագանքել Բաքվից:
«Ձեր նշած բոլոր հանգամանքներն էլ այս կամ այն չափով կարող էին ազդեցություն ունենալու պաշտպանության նախարարի փոփոխություն կատարելու որոշման վրա, բայց լիարժեք այդ հարցին կարող է քաղաքական մեծամասնության ղեկին նստած անձնավորությունը, եւ կարծում եմ, որ մարդիկ մեկ մարդու քմահաճությամբ են փոխվում պաշտոններում: Այն ժամանակ, միգուցե, չէր հասկանում՝ ինչ է նշանակում սահմանային ծառայությունը, բացթողումները, չնայած նրան, որ մայիսին բացթողումներն ավելի շատ են եղել, քան հիմա»,- նկատեց Սեյրան Օհանյանը:
Անդրադառնալով հայ-ադրբեջանական սահմանի արեւելյան ուղղությամբ նախօրեից իրավիճակի սրմանը՝ Օհանյանը նկատեց.
«Մենք խորությամբ չենք տիրապետում սահմաններում կատարվողին՝ տեղեկություններ ենք ստանում համացանցից, որտեղ տեղեկատվություն եւ՛ մեր կայքերն են տարածում, եւ՛ հակառակորդը: Դրանից միանշանակ եզրակացություն հնարավոր չէ անել: Բայց այն, որ ինչ-որ բացթողումներ եղել են մեր սահմանապահ ստորաբաժանումների կողմից, միանշանակ է, ինչը վերջին պատերազմից հետո երկիրը պարտության տարած իշխանությունների պարտվողական քաղաքականության հետեւանքն է: Պարտված իշխանությունները թե՛ հակառակորդի հետ հարաբերություններում եւ թե՛ միջազգային հարթակում միշտ ճնշման տակ են գտնվում:
Մյուս կողմից, հակառակորդի կողմից հեռահար նպատակները չեն փոխվել՝ միջանցքի բացում Նախիջեւանը Թուրքիայի եւ Ադրբեջանի հիմնական տարածքի հետ կապելու նպատակով՝ հեռահար խնդիրներ լուծելու համար: Դա հենց այնպես չէ՝ արտահայտվում է ինչպես Թուրքիայի եւ Ադրբեջանի հռետորաբանությամբ, այնպես էլ նման սահմանային սադրանքներ ու հանցագործություններ պարունակող գործողություններով: Բացակայում են այն գործողությունները, որոնց պետք է ՀՀ իշխանությունները դիմեն, հստակ չեն գնահատում իրադրությունն ու չեն որոշում անհրաժեշտ առաջնահերթությունները՝ հատկապես սահմանային բնակավայրերում մեր ժողովրդի կենսունակությունն ապահովելու ուղղությամբ: Զգալի աշխատանքներ են իրականացնում երկրի ներսում, մայրաքաղաքում՝ ճանապարհներ, ասֆալտապատում, բայց այն ինժեներական ու շինարարական ներուժը չեն նետում սահմաններն ամրապնդելուն, բանակին թիկունք կանգնելու համար: Ուռճացված ոստիկանական զորքեր կան, կարմիր բերետավորներ, կոնկրետ պաշտոնատար անձանց պահպանությունն իրականացնող Պետական պահպանության ծառայություն, բայց սահմանների պաշտպանությամբ չեն զբաղվում:
Սրանք հենց այնպես խոսքեր չեն՝ հակառակորդի նախագահը քանի անգամ է իրենց բանակի համազգեստը հագած գնացել այն վայրեր, որոնք իրենք գրավել են Արցախի տարբեր հատվածներում, բայց մենք չենք տեսել մեր երկրի վարչապետին, որ նույն կերպ հագնի մեր համազգեստն ու պարբերաբար լինի սահմաններում: Առաջնահերթությունները որոշելու ունակության բացակայությունն է հանգեցնում սրան»,- եզրափակեց Օհանյանը:
Աշխարհի ամենահայտնի Խորհրդարանական ծեծկռտուքները (ֆոտոշարք)
Եթե օրենքի ընդունումը թույլ տա փրկել ընտանեկան բռնության թեկուզ մեկ զոհի կյանք, ուրեմն միանշանակ պետ...
Նիդերլանդները հրաժարվել է մասնակցել «Եվրատեսիլ 2027»-ին
Բրազիլիայի նախագահի թեկնածուն լքել է երկիրը ընտրություններում պարտվելուց հետո
Էլեկտրաէներգիայի ընդհատումներ կլինեն Երևանում և մարզերում
Ռուսական դիզելային վառելիք տեղափոխող երեք լցանավի կարգելվի մուտք գործել Նյու Ջերսիի նավահանգիստ
Նիդերլանդների Թագավորության արտաքին գործերի նախարարն այցելել է Moon Rose ջերմոցային տնտեսություն
Նոր նշանակում՝ Երևանի Նիկոլ Աղբալյանի անվան թիվ 19 դպրոցում
Սահմանադրական դատարանի նախագահի ընտրության հարցով նիստը տեղի կունենա նոյեմբերի 6-ին
ՀԱՊԿ- ից Հայաստանին պետք է հեռացնել. Բորդյուժան՝ «ՌԻԱ Նովոստիին»