Արմեն Չարչյանի վիճակը կայուն վատ է, նրա մոտ բացի թոքաբորբից այլ հիվանդություն է ախտորոշվել

«Իզմիրլյան» բժշկական կենտրոնի նախկին տնօրեն, «Հայաստան» խմբակցության պատգամավոր Արմեն Չարչյանի վիճակը կայուն վատ է։ Այս մասին ArmDaily.am-ի հետ զրույցում ասաց Չարչյանի պաշտպան Էրիկ Ալեքսանյանը։

«Նրա մոտ արդեն թոքաբորբ է ախտորոշվել։ Այսօր այցելել եմ, նաև բուժող բժշկի հետ եմ խոսել։ Համապատասխան հարցում եմ թողել, որպեսզի ինձ ընթացիկ էպիկրիզ տրամադրեն, թե այս ժամանակահատվածում նա, գտնվելով այնտեղ, ինչ հետազոտություններ է անցել և ինչ ախտորոշումներ կան։ Թոքաբորբից զատ այլ հիվանդություն է նաև ախտորոշված։ Վաղը կստանամ էպիկրիզը և ավելի մանրամասն կհրապարակեմ, թե էլ ինչ հիվանդության հետ գործ ունենք այս պահի դրությամբ»,- ասաց պաշտպանը։

Ինչ վերաբերում է դատական գործընթացին՝ Ալեքսանյանը նշեց, որ դեռ սպասում են։

«Մեր դատավորը, ում վարույթում գտնվում է գործը, արձակուրդում է։ Դրանով է երևի պայմանավորված, որ դեռ նիստ չի հրավիրում։ Չեմ կարող ասել՝ երբ կվերադառնա արձակուրդից և բնականաբար չեմ կարող ասել, երբ նիստ կհրավիրի»,- ասաց Ալեքսանյանը։

Հիշեցնենք, որ Չարչյանը շարունակում է բուժում ստանալ Քանաքեռ- Զեյթուն բժշկական կենտրոնում: Նա օգոստոսի 24֊ին տարել է սուր ինֆարկտ, ունի շաքարային դիաբետ և բարձր ինսուլին։ Խափանման միջոցը փոխելու հարցով նրա պաշտպանական կողմը երկու անգամ դիմել է դատարան, սակայն ապարդյուն։

ՀՀ վերաքննիչ քրեական դատարանն օգոստոսի 23-ին Չարչյանին գրավի դիմաց ազատ արձակելու որոշման դեմ դատախազության բողոքը բավարարել էր։ Դատարանի որոշումից հետո Արմեն Չարչյանը սեփական նախաձեռնությամբ գնացել էր քրեակատարողական հիմնարկ, ապա՝ կալանավորվել։ Օգոստոսի 30-ին հայտնի դարձավ, որ Չարչյանի առողջական վիճակը վատացել է, ու նա տեղափոխվել է քաղաքացիական հիվանդանոց։

Նշենք, որ Չարչյանին մեղադրանք է առաջադրվել՝ ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):

Այս թեմայով Արմեն Չարչյանի գործով հրատապ նիստ է հրավիրվել Անձը պետք է անպայման ընկնի կոմայի մեջ, որ հասկանան լուրջ խնդրի հետ գործ ունեն. Չարչյանի փաստաբան Օրենքը չի պարտադրում բոլոր մեղադրյալներին կալանավորել Կտրուկ վատթարացել է պրոֆեսոր Արմեն Չարչյանի առողջական վիճակը Նիկոլն Արմեն Չարչյանին դանդաղ սպանում է. Արմեն Գրիգորյան (տեսանյութ)