Հայաստանի վրա Բաքվի բռնապետի ճնշման պարբերական փորձերն ակնհայտորեն ուղղված են նաև Մոսկվայի դեմ. Ոսկանյան

Դատելով նաև ռուսաստանյան քաղաքական դաշտի արձագանքներից, Բաքվի և Մոսկվայի միջև կան սուր հակասություններ՝ հատկապես կապված ռուսաստանցի խաղաղապահների մանդատի հետ։ Այս մասին ֆեյսբուքյան իր էջում գրել է իրանագետ Վարդան Ոսկանյանը:

«Բաքվի բռնապետի քարոզչամիջոցներով քանիցս հնչեցվել են գրեթե անթաքույց սպառնալիքներ առ այն, որ Ռուսաստանի Դաշնության խաղաղապահ զորակազմն Արցախում իբր չունի որևէ իրավական կարգավիճակ, ուստի Ադրբեջանը դրա հետ կարող է վարվել այնպես, ինչպես կամենա։

Բոլորվին այլ հարց է, որ աշխարհում ռազմական ներուժի առումով կան ընդամենը մատների վրա հաշված պետություններ, որոնց հետ անհնար է «վարվել այնպես, ինչպես կամենաս», և դրանցից մեկը, որքան էլ Ադրբեջանում փորձեն իբր չնկատել, Ռուսաստանն է։

Այս համատեքստում Հայաստանի վրա Բաքվի բռնապետի ճնշման պարբերական փորձերն ակնհայտորեն ուղղված են նաև Մոսկվայի դեմ, որի ռազմական ներկայության նկատելի աճը Հարավային Կովկասում ուղղակիորեն հակասում է Անկարայի շահերին, որն էլ փորձում է այս ուղղությամբ աշխատել իր գործակատար Ադրբեջանի միջոցով»,- գրել է իրանագետը։