նիկոլի գերնպատակը. Ադրբեջանը բերել Հայաստան

Գորիս-Կապան ճանապարհն ադրբեջանցի զինծառայողների կողմից փակելուց հետո նիկոլը շտապեց հայտարարել, թե ադրբեջանցիները փակել են այն հատվածը, որն անցնում է իրենց տարածքով: Ավելին, նա օգտագործեց ադրբեջանական տեղանունները:

Այսպիսով, առանց սահմանազատման եւ սահմանագծման նա հայտարարում է, թե այս կամ այն հատվածը պատկանում է Ադրբեջանին, հաղթաթղթեր տալով ադրբեջանցիներին հետագա բանակցությունների ժամանակ:

Ավելին, վերցնելով 2010-ին կազմված հողօգտագործման քարտեզները, նիկոլն անդադար հայտարարում է, թե Շունուխից այն կողմ Ադրբեջան է: Իհարկե, նա շատ լավ գիտի, թե ինչու է այդ քարտեզներում նշված Ադրբեջան անունը, գիտի, որ այն որեւէ նշանակություն չունի սահմանազատման եւ սահմանագծման, առավել եւս Արցախի կարգավիճակի որոշման հարցում, բայց անդադար ադրբեջանամետ հայտարարություններ է անում:

Նա այս հարցում ունի օգնականներ, նվիրյալներ, որոնց նպատակը եւս մեկն է՝ Ադրբեջանը բերել Հայաստան: Նրանք ցինիկ են, նաեւ անբարոյական: Օգոստոսի 27-ին, երբ պատերազմի սկզբից անցել է 11 ամիս, երբ տղերքի շիրիմները դեռ թարմ են, երբ կան հարյուրավոր անհետ կորածներ եւ գերիներ, Էկոնոմիկայի տխրահռչակ նախարար Վահան Քերոբյանն Ադրբեջանի գովազդն է անում, ասելով, թե երբ փոքր էր՝ հինգ տարեկան, շուկայում ադրբեջանցիներն առեւտուր էն անում:

Վահան Քերոբյանը գուցե շուկա միայն հինգ տարեկանում է գնացել, քանի որ ադրբեջանցիները մեր շուկաներում առեւտուր էին անում, երբ նա նույնիսկ 11 տարեկան էր, բայց խնդիրն այստեղ ավելի լուրջ է: Նախարարի պաշտոնը զբաղեցնող այս անձնավորությունը հանրությանը պատրաստում է ադրբեջանցիների զանգվածային թափանցմանը Հայաստան:

Ընդ որում, սա նոր պատմություն չէ: Պատերազմի ավարտից երեք շաբաթ անց այս նույն Քերոբյանը Հանրային հեռուտաընկերությանը տված հարցազրույցում անդրադարձավ թուրքական ու ադրբեջանական շուկա մուտք գործելուն: Ըստ նրա, տարածարշրջանի ապաշրջափակումը մեզ տալու է բազմաթիվ նոր մարտահրավերներ, բայց տալու է նաեւ նոր հնարավորություններ: Հայերի համար հասանելի կլինեն թուրքական նավահանգիստները, որտեղով կարելի է ապրանք արտահանել Ռուսաստան, մեզ համար հասանելի կլինի ադրբեջանական շուկան, իսկ Ադրբեջանի համար՝ մեր շուկան:

Սա է նիկոլի կլառավարության երազանքը. ադրբեջանցիներին եւ թուրքերին բերել Հայաստան, Թուրքիան եւ Ադրբեջանը բերել Հայաստան: 

Իսկ ՀՀ բարձր տեխնոլոգիական արդյունաբերության նախարար Վահագն Խաչատրյանի հայտարարությունը, թե 29.8 հազար քառ. կմ-ից ոչ մի թիզ չենք տալու Ադրբեջանին, միայն ավելի ու ավելի է բացահայտում սրանց էությունը: Նրա հայտարարությունը նշանակում է, որ նիկոլի վարչախումբը ձեռքերը լվանում է Արցախից եւ արցախցիներից, եթե ստացվի, եթե այլ երկրներ դեմ չլինեն, կփորձեն Տավուշի կարեւորագույն ճանապարհները՝ անկլավների փոխանակման անվան տակ հանձնել թշնամուն, այդ թվում Արարատի մարզի Տիգրանաշենը, իսկ դե Գեղարքունիքի որոշ տարածքների, Սեւ լճերի վերադարձի մասին նա լռում է, նրանք լռում են:

Եւ ամենակարեւորը, այս հանցագործությունները նրանք բարդելու են ժողովրդի վրա, որոնք իրենց քվե են տվել, բայց ժողովրդի, ընտրողների 25 տոկոս ձայնը այս կամ այն կերպ ստանալը դեռ հիմք չէ Հայաստանը թաղելու համար: Ձեռքներդ հեռու մեր երկրից, մեր Հայաստանից:

Հակոբ Ասատրյան

Top-News.am