Վանեցյան. Ընդդիմության պարտքն ու պատասխանատվությունը իշխանությանն ընդդիմախոս լինելն է

Բարեփոխումներ անցկացնելը, երկրի անվտանգության ապահովումը, սահմանների անձեռնմխելիության պահպանումը իշխանությունների պարտքն ու պատասխանատվությունն է: Այս մասին օգոստոսի 11-ին Հայաստանի Ազգային ժողովի ամբիոնից հայտարարեց «Պատիվ ունեմ» խմբակցության ղեկավար Արթուր Վանեցյանը:

«Ընդդիմության պարտքն ու պատասխանատվությունը իշխանությանն ընդդիմախոս, քննադատ լինելն է: Երբեմն այդ քննադատությունը կարող է լինել սուր եւ ոչ միշտ հաճելի ձեզ համար: Բայց մեզ Ազգային ժողով պատվիրակել են այն քաղաքացիները, ովքեր համաձայն չեն ձեր կառավարման հետ: Ճիշտ չեմ համարում ձեզ քննադատելու մեջ մեզ մեղադրելը»,- ասաց Վանեցյանը:

Ընդդիմադիր խմբակցության ղեկավարի մոտ իշխանական պատգամավորների ելույթներից տպավորություն է ստեղծվել, որ նրանք փորձում են ստեղծել ստեղծել այնպիսի իրավիճակ, որ ընդդիմությունը չխոսի 44-օրյա պատերազմի հետեւանքների մասին: «Որպեսզի նա չխոսի այն մասին, թե ինչու է տեղի ունեցել պատերազմը, ինչու են զոհվել մեր հայրենակիցները, ինչու՞ ենք մենք կորցրել մեր հայրենիքի արցախյան հատվածի 75%-ը: Ինչու՞ են Ադրբեջանի զինված ուժերը դեռ գտնվում Հայաստանի ինքնիշխան տարածքում եւ հետ չեն շպրտվել: Այս հարցերի պատասխանները պետք է տրվեն, եւ որքան էլ դա ձեզ համար տհաճ լինի, մենք դրանք կտանք»,- նշեց պատգամավորը:

Նա անդրադարձավ նաեւ հաշտության մեկնած ձեռքի վերաբերյալ ՀՀ ԱԺ նախագահ Ալեն Սիմոնյանի առաջարկին: Նրա խոսքով՝ այսօր տեղի ունեցածը «զրոյացնելու» առաջարկը տրամաբանական կլիներ, եթե նա մինչ այդ չեղյալ համարեր նախկինում կիրառված կարգապահական տույժը: «Թեեւ ես գիտեմ, որ «ԱԺ կանոնակարգի մասին» օրենքը նման լիազորություններ չի տալիս ԱԺ նախագահին, բայց դուք կարող էիք գոնե քաղաքական հայտարարություն անել»,- ասաց Վանեցյանը։

Ի պատասխան՝ խորհրդարանի նախագահը հայտարարեց, որ որոշումը չեղյալ հայտարարելու հնարավորություն ունի միայն Ազգային ժողովի խորհուրդը, սակայն այն դեռ ձեւավորված չէ: «Դուք կարող եք իմ հայտարարությունն ընդունել որպես այդպիսի քայլ: Ես հավատարիմ եմ այն ամենին, ինչ ասել եմ»,- հավելեց Սիմոնյանը:

Հիշեցնենք, որ այսօր ԱԺ-ում լարված իրավիճակ էր: Նախ «Պատիվ ունեմ» դաշինքի պատգամավոր Աննա Մկրտչյանը իր ելույթում ՀՀ վարչապետ Նիկոլ Փաշինյանին անվանեց «կապիտուլյանտ», որից հետո Ալեն Սիմոնյանը անջատեց խոսափողը եւ խնդրեց հեռանալ դահլիճից: Ավելի ուշ ելույթ ունեցավ ընդդիմադիր «Հայաստան։ խմբակցության Ազգային ժողովի փոխխոսնակ Իշխան Սաղաթելյանը, որից հետո իրավիճակը էլ ավելի սրվեց: Ալեն Սիմոնյանն արձագանքեց Սաղաթելյանի խոսքերին՝ հասարակությունը գնահատական է տվել, թե ով է «կապիտուլյանտը» եւ «հողեր հանձնողը»։ Հետո նա ամբիոն հրավիրեց «ՔՊ» կուսակցության խորհրդարանական խմբակցության ղեկավարին, եւ «Հայաստան» դաշինքի պատգամավորները տեղից սկսեցին արձագանքել Սիմոնյանի հայտարարությանը: Ի վերջո, ԱԺ նախագահը նիստերի դահլիճ հրավիրեց անվտանգության ծառայության զինվորական համազգեստով աշխատակիցների, որից հետո հրահանգեց անջատել ուղիղ եթերը:

Ավելի ուշ Հայաստանի Ազգային ժողովի նախագահ Ալեն Սիմոնյանն առաջարկեց «զրոյացնել» այսօր տեղի ունեցածը: «Հարգելով ՀՀ քաղաքացիներին՝ համարենք, որ այսօր մենք սպառել ենք նրանց համբերությունը եւ դադարեցնենք այս հռետորաբանությունը: Սա համարեք ձեզ մեկնած ձեռք: Կարծում եմ, որ մենք կարող ենք եւ պետք է աշխատենք միասին»,- ասաց նա: