Նորընտիր ԱԺ-ն շարունակում է աշխատանքը. Օրակարգում ԱԺ ընդդիմադիր փոխխոսնակի ընտրությն հարցն է (տեսանյութ)

Հայաստանի նորընտիր Ազգային ժողովն այսօր՝ օգոստոսի 4-ին շարունակում է իր աշխատանքը:

Հիշեցնենք, որ նորընտիր ԱԺ առաջին երկու օրերին ԱԺ նախագահ է ընտրվել Ալեն Սիմոնյանը, փոխխոսնակ՝ ռուբեն Ռուբինյանը: Նախօրեին քննարկվեց ԱԺ փոխխոսնակի պաշտոնում ՔՊ-ից Հակոբ Արշակյանի թեկնածությունը, սակայն ընտրությունը տեղի կունենա այսօր:

Դրանից հետո խորհրդարանը ձեռնամուխ կլինի ԱԺ երրորդ փոխխոսնակի ընտրության հարցի քննարկմանը, որը պետք է լինի ընդդիմության ներկայացուցիչ: Ընդդիմադիր խմբակցություններն այդ պաշտոնում առաջադրել են «Հայաստան» խմբակցության պատգամավոր Իշխան Սաղաթելյանի թեկնածությունը:

Հատկանշական է, որ «Հայաստան» եւ «Պատիվ ունեմ» դաշինքները հայտարարել են, որ չեն մասնակցելու ԱԺ փոխխոսնակների ընտրությանը, այդ թվում Իշխան Սաղաթելյանի:

ԱԺ անդրանիկ նստաշրջանի օրակարգում 7 հարց է, որի 5-ը դեռ չեն քննարկվել: Դրանք են՝

- Ազգային ժողովի նախագահի երեք տեղակալների ընտրություններ

- Հայաստանի Հանրապետության ութերորդ գումարման Ազգային ժողովի մշտական հանձնաժողովներ ստեղծելու մասին

- Մշտական հանձնաժողովների նախագահների ընտրություններ

- Կառավարության առաջարկությամբ՝ Կառավարության կառուցվածքի փոփոխության վերաբերյալ օրենքի նախագծի քննարկում

- Կառավարության ծրագրին հավանություն տալու հարց:

Նշենք, որ «Քաղաքացիական պայմանագիրն» առաջարկում է, որ ԱԺ-ն ունենա 12 մշտական հանձնաժողովներ, ներկայիս 11-ի փոխարեն: Առաջարկվում է առանձնացնել առողջապահության եւ սոցիալական հարցերի հանձնաժողովները:

Իսկ ահա «Պատիվ ունեմ» եւ «Հայաստան» խմբակցությունները նախագիծ են ներկայացրել, որով առաջարկում է ստեղծել Արցախի հարցերով մշտական հանձնաժողով: