Նոր մանրամասներ Գորիսի կրակոցներից

«Հրապարակ»-ը գրում է. «Արդեն գրել ենք, որ գիշերը Գորիսում փոխհրաձգություն է եղել: Սուրիկ Խաչատրյանի որդին (Սյունիքի նախկին մարզպետ, առավել հայտնի է որպես «Լիսկա») Տիգրան Խաչատրյանը կրակել է Սյունիքի ներկայիս մարզպետ Մելիքսեթ Պողոսյանի որդու վրա: Թեպետ երկու կողմի հետ մեզ կապվել չհաջողվեց, բայց մեր ունեցած նոր տեղեկություններով նախկին եւ ներկա մարզպետների որդիները միայնակ չեն եղել «ռազբորկայի» վայրում՝ Գորիսի Ակսել Բակունցի հուշարձանի հարակից տարածքում։ Ավելին` նրանք փոխհրաձգությունից չեն էլ տուժել, տուժել են այլ անձիք, որոնց գիշերը տեղափոխել են հիվանդանոց, իսկ նրանցից մեկին հասցրել են Երևան:

Ըստ տեղեկությունների՝ վիրավորներից մեկը Մելիքսեթ Պողոսյանի որդու մտերիմն է, մյուսը՝ Տիգրան Խաչատրյանի մորեղբոր որդին, որի վիճակն առավել ծանր է: Շրջանառվող լուրերի համաձայն՝ վիճաբանությունը քաղաքական հողի վրա է ծավալվել :Նախկին մարզպետի որդուն ափերից հանել է ներկայիս իշխանության պահվածքը, իր մտերիմների նկատմամբ հալածանքներ սկսելու գործելաոճը»։