Դպրոց փակելը սովորական հանցագործություն է

Իշխանությունները գրեթե մեծ հպարտությամբ հայտարարում են փակված կամ փակվող դպրոցների մասին: Դպրոց փակելը արդեն սովորական է դարձել: Մի պահ պատկերացրեք, թե ինչ աղմուկ կբարձրացնեին բլոգերները, լրագրողները, մտավորականները, եթե Վրաստանում կամ Թուրքիայում հայկական դպրոց փակվեր: Հիմա լռում են: Հիմա լռում են գրեթե բոլորը:

Պարզ է: Արտագաղթի սարսափելի տեմպերը հանգեցրել են նրան, որ մի շարք դպրոցներում աշակերտների թիվը նվազել է: Այսուհանդերձ, եթե նույնիսկ դպրոցում մնացել է ընդամենը մեկ աշակերտ, ապա այդ դպրոցը չի կարելի փակել: Դպրոց փակել՝ նշանակում է հանձնվել, ընդունել պետության պարտությունը:

Ի վերջո Սերժ Սարգսյանը խոսում է այն մասին, որ տարիներ հետո հասնելու ենք չորս միլիոն բնակչության: Ստացվում է մեծ ու փոքր պաշտոնյաները չեն հավատում Սերժ Սարգսյանին: Եթե հավատային դպրոցները չէին փակի, այլ հատուկ ծրագրեր կմշակեին թույլ դպրոցներն ուժեղացնելու, կատարելագործելու, աշակերտներով ապահովելու համար:

Դպրոց փակելը սովորական հանցագործություն է: Իսկ եթե, իսկապես, մի օր կրկին բնակչության թիվն աճի, ապա ինչպե՞ս եք օլիգարխներին անցած նախկին դպրոցի շենքերը ետ վերադարձնելու:

Երկրում իշխում է հոգեխանգարմունքը եւ ծերունախտը: Սթափվեք, կանգ առեք: Դպրոց փակելը շատ վատ, սարսափելի վատ նշան է: Միայն թե չասեք, թե Լատվիայում կամ Էստոնիայում էլ են դպրոցներ փակում: Դա արդեն ծիծաղելի է:

Եւ նաեւ մտածեք, թե ինչու են աճում ռեստորանների, մոթել-հոթելների թիվը, իսկ դպրոցների թիվը նվազում ու նվազում է: Կանգ առեք: Չի կարելի դպրոց փակել: Դպրոցը պետք է դպրոց մնա, եթե այնտեղ նույնիսկ մեկ աշակերտ է մնացել:

Top-News.am