2018-2019-ին կառավարությունը գայթակղվեց հարկերի բարձր մակարդակով և չափից շատ պարտավորություններ ստանձնեց.Վարդան Արամյան

Առաջին քայլը, որ ընտրություններից հետո նոր կառավարությունը պետք է ուշադրություն դարձնի այն է, որ կայունության 4 հենասյուներից երեքը, որոնք այսօր բացակայում են, պետք է արագ կարգաբերի: Այս մասին այսօր՝ մայիսի 25-ին, «Պատիվ ունեմ» դաշինքի նախաձեռնած կլոր սեղան քննարկման ժամանակ ասաց ֆինանսների նախկին նախարար Վարդան Արամյանը:

Նրա խոսքով, դրանք են հարկաբյուջետային կայունություն, դրամավարկային եւ ֆինանսական քաղաքական կայունություն եւ անվտանգություն. «Միջազգային փորձը ցույց է տալիս, որ դրանցից ամենակարեւորը անվտանգությունն է. եթե անվտանգային միջավայրն ապահովված չէ, մենք պետք է տնտեսական զարգացման կամ արագ ներդրումային ներհոսքի մասին մոռանանք: Սա կարեւորագույն խնդիր է:

Տնտեսական հիմնասյուները եւս կարեւոր են. Տարբեր տնտեսագետներ բազմիցս խոսել են հարկաբյուջետային կանոնների խախտման մասին, որն ունի իր օբյեկտիվ եւ սուբյեկտիվ պատճառները»,-ասաց նա:

Արամյանի խոսքով, օբյեկտիվը տնտեսական ճգնաժամն է, երբ շատ երկրներ պարտադրված եղան բարձր դեֆիցիտներ ունենալ. «Մեր պրոբլեմն այն է, որ 2018-2019 թվականներին կառավարությունը շատ պահային որոշումներ էր կայացնում առանց հեռակետին նայելու: Այսինքն գայթակղվեց հարկերի հավաքագրման բարձր մակարդակով եւ չափից շատ ընթացիկ ծախսերի գծով պարտավորություններ ստանձնեց, որի հնարավորությունը չուներ:

Մենք պարտադրված ենք ապրել մի իրողության մեջ, որտեղ 2021 թվականի բյուջեն նախագծված է 342 մլրդ դրամ պակասորդով, որից ընդամենը 215 մլրդն ենք մենք ուղղում կապիտալ ծախսերին, իսկ մնացածը պարտքային միջոցները մենք վերաուղղում ենք մեր ընթացիկ ծախսերի ֆինանսավորմանը, սա լուրջ խնդիր է, խորը վերլուծական աշխատանք է պետք»,-ընդգծեց նախկին նախարարը:

Հաջորդ կարեւոր խնդիրը, որը մեր նոր Կառավարությունը պետք իր դիտակետում պահի, ըստ Վարդան Արամյանի, հաղորդակցությունն է տնտեսվարող սուբյեկտների եւ հանրության հետ. «Մենք պետք է մոռանանաք այն դոկտրինան, երբ Կառավարությունը այսօր մի բան է ասում, վաղը այլ բան է անում: Այդ ֆոնի վրա ներդրումները միանգամից կներհոսեն: Ներդրումների համար շատ կարեւոր է կայունությունը, ինչպես նաեւ այն, թե կառավարությունն ինչ ազդակներ է տալիս եւ հետո դրանք որքանով է պահպանում: Եթե կառավարությունը ասում է մի բան, անում է մեկ այլ բան, ներդրողները դառնում են հոռետես»,-ասաց նա:

Նախկին նախարարի խոսքով, շատ կարեւոր է, որ ճգնաժամից հետո շատ արագ միջոցներ մոբիլիզացնենք եւ կապիտալի կուտակում կատարենք, որ ամրացնենք մեր տնտեսության հենքերը. «Լավագույն ոլորտը, որ կարող է ապահովել մեծ արտարժութային ներհոսք, դա հանքագործությունն է: Այստեղ պետք է ուշադրություն դարձնել շրջակա միջավայրի խնդիրներն ու տնտեսական շահերը բալանսավորելուն: Կան գործող ընկերություններ, որոնց ներուժը պետք է ճիշտ օգտագործել:

Կարծում եմ՝ մի բան եւս, որ միշտ բացակայել է, միջազգային կառույցների գործիքների եւ հնարավորությունների ճիշտ օգտագործումն է: Ցավոք, մեր երկիրը թերացավ միջազգային կառույցների կողմից տրամադրվող գործիքակազմերից օգտվելուց»: