Վարչապետի աթոռից կառչածի եւ ԱԳՆ պատասխանատուների հայտարարությունների միջեւ կան հակասություններ. «Պատիվ ունեմ» դաշինք

«Պատիվ ունեմ» նախընտրական դաշինքը հայտարարություն է տարածել այսօր ԱԳ նախարարի պաշտոնակատար Արա Այվազյանի հետ հանդիպման մասին։

Հայտարարության մեջ, մասնավորապես, նշվում է.

«Ի կատարումն «Պատիվ ունեմ» դաշինքի պահանջի՝ այսօր տեղի է ունեցել դաշինքի ներկայացուցիչների եւ ՀՀ ԱԳ նախարարի ժամանակավոր պաշտոնակատար Արա Այվազյանի հանդիպումը, որի ընթացքում «Պատիվ ունեմ» դաշինքը ԱԳ պաշտոնյայից պարզաբանումներ է պահանջել Հայաստանի եւ Արցախի կենսական շահերին վերաբերող գործընթացների եւ սեղանին առկա փաստաթղթերի վերաբերյալ:

Ա.Այվազյանի հավաստիացումները վերաբերում էին այն հանգամանքին, որ իրենց գերատեսչությունը տեղյակ է միայն մամուլում շրջանառվող նախագծից, եւ որեւէ այլ փաստաթուղթ ԱԳՆ խողովակներով չի անցել:

Հաշվի առնելով դավադիր կապիտուլյանտի ստախոս աշխատաոճը եւ Հայաստանի ու Արցախի համար՝ դրա կործանարար հետեւանքները, տվյալ հանգամանքը չի բացառում մեր կենսական շահերին առնչվող հավելյալ նախագծերի առկայության կամ նախապատրաստման գործընթացը, որը ընթանում է՝ շրջանցելով արտաքին քաղաքականության համար պատասխանատու գերատեսչությունը:

Սա պայմանավորված է այն հանգամանքով, որ կապիտուլյանտը բազմիցս մոլորեցրել է հանրությանը, թաքցրել բանակցային գործընթացի կարեւորագույն դրույթները, «բանավոր ըմբռնումով» տարածքներ է հանձնել, գաղտնիության պայմաններում տարբեր խնդրահարույց հարցերի շուրջ պայմանավորվածություններ է ձեռք բերել թշնամու հետ եւ փաստաթղթեր ստորագրել:

Վերջին շրջանում քիչ չեն նաեւ վարչապետի աթոռից կառչած անձի եւ ԱԳՆ պատասխանատուների հայտարարությունների միջեւ առկա ակնհայտ հակասությունները, որոնք այս իշխանությունների քաոտիկ կառավարման մասին վկայող եւս մեկ ախտանշան են հանդիսանում:

Ակնհայտ է, որ ստեղծված ճգնաժամը իշխանության հանցավոր անգործության, մասնավորապես՝ պետական սահմանի տարբեր հատվածներում անվտանգային անհրաժեշտ համակարգերի ներդրման տապալման հետեւանք է, ինչի արդյունքում Ադրբեջանը ոչ միայն զարգացրել է իր առավելությունը մարտադաշտում եւ դիվանագիտական հարթությունում, այլեւ Հայաստանին նոր զիջումների օրակարգ թելադրել:

Հաշվի առնելով Հայաստանի ու Արցախի շուրջ ստեղծված ծանր իրադրությունը եւ դրանում գլխավոր ստախոսի աններելի մեղքը, կրավորական եւ պարտվողական կեցվածքը, լեգիտիմության բացակայությունը, դավաճանական հետագիծը, տապալված դիվանագիտական միջավայրը,

«Պատիվ ունեմ» դաշինքը կապիտուլյանտից պահանջում է.

1. անմիջապես դադարեցնել բոլոր ստվերային գործարքները եւ գաղտնի բանակցությունները Հայաստանին եւ Արցախին վերաբերող հարցերով:

2. մինչեւ արտահերթ ընտրությունների ավարտը եւ նոր իշխանության ձեւավորումը զերծ մնալ Հայաստանի Հանրապետության անունից հայ ժողովրդի ազգային շահերին առնչվող խոստումներից։

3. դիվանագիտական ներուժը կենտրոնացնել Արցախի կարգավիճակի, Հայաստանի տարածքային ամբողջականության վերականգման եւ ապահովման, ինչպես նաեւ գերության մեջ գտնվող մեր հայրենակիցներին վերադարձնելու ուղղությամբ:

«Պատիվ ունեմ» դաշինքը նաեւ հորդորում է Ադրբեջանին դուրս բերել իր զինված ուժերը Հայաստանի Հանրապետության ինքնիշխան տարածքից՝ վերահաստատելով իր պատրաստակամությունը անհրաժեշտության պարագայում կրկին լծվել հայրենիքի պաշտպանության գործին»։