Հարյուրավոր հայորդիների կյանքեր խլած «Լելե Թեփե» օպերացիայի առնչությամբ քրգործ չի հարուցվել

Պատերազմի ժամանակ հայկական կողմին մեծ վնաս հասցրած, հարյուրավոր հայորդիների մահվան պատճառ դարձած «Լելե Թեփե» օպերացիայի առնչությամբ քրեական գործի չի հարուցվել։ Դատախազությունից «Փաստինֆո»-ի գրավոր հարցմանն ի պատասխան հայտնել են, որ այդ մասին հրապարակումները քննության առարկա կդառնան ԱԱԾ-ում քննվող այլ քրեական գործի շրջանակներում։

Հիշեցնենք, որ «Ճշմարտություն սերունդների համար» նախաձեռնության կողմից հետաքննություն է իրականացվում պատերազմի ելքը որոշած ջեբրայիլյան կամ Լելե թեփեի գործողության առնչությամբ։ Նշված ռազմական գործողությունն անցկացվել է հոկտեմբերի սկզբին, և որի հետևանքով ռազմաճակատում ադրբեջանաթուրքական կողմը ստացավ մեծ առավելություն՝ փաստացի վճռելով պատերազմի ելքը։

«Դավաճանություն էր սա, թե արկածախնդրություն, որի հետևանքով հարյուրավոր զոհեր տվեցինք և կրեցինք նյութատեխնիկական հսկայական կորուստներ, թողնում ենք իրավապահ համակարգին՝ հայկական նյուրնբերգյան դատավարությանը, իսկ առայժմ արձանագրում ենք, որ գործողության մասին հանրությանն առաջինը հայտնել է վարչապետ, գերագույն գլխավոր հրամանատար Նիկոլ Փաշինյանը, հենց ռազմական գործողության ընթացքում, հարցազրույց տալով ռուսաստանյան RBK հեռուստաալիքին:

Գեղամ Նազարյանը նաեւ հայտարարել էր. «Սա ավելի շատ ոչ թե ռազմական գործողություն էր հիշեցնում, այլ ցեղասպանություն՝ դիտավորությամբ։ Ամենամեղմ գնահատականներով միայն այդ գործողության ընթացքում 650 զոհ ենք ունեցել։ 44 տանկից 42-ը թողել ենք մարտի դաշտում»։

«Փաստինֆո»-ն ապրիլի 12-ին գրավոր հարցում էր ուղարկել ՀՀ գլխավոր դատախազություն՝ պարզելու, թե ինչ ընթացք է տրվել «Լելե Թեփե» պայմանական անունն ունեցող ռազմական գործողության վերաբերյալ հաղորդմանը, արդյո՞ք հարուցվել է քրեական գործ՝ ավելի քան 600 զինվորի մահվան պատճառ դարձած ռազմական գործողության ընթացքում թույլ տրված հնարավոր ռազմական հանցագործությունների վերաբերյալ։ Պարզվում է՝ ոչ։ Այն քննության առարկա կդարձնեն զինվորական պարտականությունների կատարումից խուսափելու դեպքի առթիվ հարուցված քրեական գործի շրջանակներում։

««Ճշմարտություն սերունդների համար» նախաձեռնության անդամների կողմից հրապարակված հայտարարությամբ ներկայացված ռազմագործողության վերաբերյալ տվյալները, ինչպես նաև դրա առնչությամբ պաշտոնատար անձանց կողմից արված և ԶԼՄ-ներով հրապարակված հայտարարությունները ՀՀ գլխավոր դատախազության նախաձեռնությամբ քննության առարկա են դարձվել Շուշիի, Հադրութի, Մեխակավանի, Հորադիզի ուղղություններով զորքերի և ստորաբաժանումների գործողությունների ղեկավարման, հակառակորդի կողմից բնակավայրերի գրավման կապակցությամբ ՀՀ ԱԱԾ քննչական դեպարտամենտում ՀՀ քրեական օրենսգրքի 364-րդ հոդվածի 3-րդ մասի հատկանիշներով (ռազմական դրության, պատերազմի ժամանակ կամ մարտի պարագայում՝ զինվորական ծառայությունից կամ դրա առանձին պարտականությունները կատարելուց զինծառայողի հրաժարվելը, որը զուգորդվել է դրանց չկատարմամբ կամ փաստացի դադարեցմամբ ) քննվող քրեական գործի շրջանակներում։ Նախաքննության շահերից ելնելով՝ դատախազությունից այլ մանրամասներ չեն հայտնել»,- նշված է դատախազության գրավոր պատասխանում։

Աղմկահարույց բացահայտումների հեղինակ, զոհված զինվորի հայր Գեղամ Նազարյանը չի տեղեկացվել, որ այդ նյութերը քննության առարկա են դարձվել։ «Փաստինֆո»-ի հետ զրույցում Գ.Նազարյանը նշեց, որ չի հրավիրվել հարցաքննության, որևէ ծանուցում չի ստացել։