Մարդիկ վարկով անասուն են գնել, Ադրբեջանին հողատարածքները հանձնելուց հետո ստիպված կես գնով վաճառել․ Տեղի ղեկավար

Սյունիքի Տեղ համայնքում արոտավայրեր կորցնելու պատճառով գարնանից լուրջ խնդիրներ են առաջանալու՝ դեգրադացված արոտավայրեր, արածեցված աշնանացան ցորենի ցանքսեր, վարկերը չփակած ֆերմերներ։ Այս մասին Tert.am-ի հետ զրույցում ասաց Սյունիքի մարզի Տեղ համայնքի ղեկավար Ներսես Շադունցը։

Նրա տեղեկացմամբ՝ դեռևս հստակ չէ՝ որքան վարելահողի կորուստ է եղել, քանի որ սահմանազատման աշխատանքները չեն ավարտվել։ Նա նշեց, որ մինչ արոտավայրերի կորուստը՝ համայնքի տարբեր բնակիչներ մեծ քանակով անասուններ են գնել, սակայն արոտավայրերի հանձնումից հետո ստիպված են եղել դրանք վաճառել։

«Ժամանակ կար, երբ Տեղ համայնքում ոչխարաբուծությունը մեծ թափով զարգանում էր, մարդիկ գնացին, գյուղատնտեսական վարկեր վերցրին, 55-60 000 դրամով տարբեր մարզերից անասուն գնեցին, բերեցին, որ պետք է տեղափոխվեին, իջեցնեին Արաքսի ափեր՝ ձմեռային արոտի, բայց պատերազմը սկսվեց, այդ հողերը չկան, մարդիկ կեր չէին կուտակել, արոտները չէին հերիքում, ստիպված անասունները էժան գներով՝ 30-35 000 դրամով վաճառեցին՝ այն ակնկալիքով, որ գոնե այս տարի վաճառքի գումարները կստանան, միայն մի մասն են վճարվել նույն պահին։ Երբ այդքան անասնագլխաքանակը գարնանը հանեն արոտի, տարբեր խնդիրներ են առաջանալու»,-ներկայացրեց համայնքապետը։

Նրա խոսքով՝ նաև կազմակերպված աշխատանք չի եղել, որ բնակիչները հնարավորինս քիչ տուժեն։ «Չկազմակերվեց, որ գոնե այդ մարդիկ այնպիսի գնով վաճառեին, որ կարողանային իրենց վարկերը փակել, ու այսքան չտուժեին։ Հիմա մարդիկ մոտենում են ինձ, հարցնում՝ ինչ ենք անելու, ես էլ պատասխանը չգիտեմ»,-նշեց նա։

Շադունցը հայտնեց, որ 2021-ի համար անասունների հաշվառում են կատարել, ու բազմաթիվ խնդիրներ կան, որոնց լուծումները դեռ չեն գտնվել։

«Համայնքի անասնագլխաքանակի 50 տոկոսից ավելին կրճատվել է, բայց սա մեր ունեցած համայնքի, արոտավայրերի համար էլի շատ-շատ է։ Նրանք, ովքեր անասնապահությամբ զբաղվում են, բայց քիչ քանակով, արդեն հարց են բարձրացնում, որ մեծ գլխաքանակ ունեցող ֆերմերները պետք է իրենց անասունները գյուղից հանեն, որովհետև շատ դժվար է լինելու։ Գլխաքանակի չափի հետ կապված հարց են դնում, որ կոնկրետ քանակից ավել չպահեն։ Սա տնտեսական լուրջ խնդիրներ է առաջ բերելու»,-ասաց համայնքապետը։Ինչ վերաբերում է խնդիրների լուծման տարբերակներին, համայնքապետը նշեց, թե գրավոր դիմել են կառավարությանը, հանդիպում է եղել մարզպետի հետ, նա էլ իր հերթին է դիմել կառավարությանն ու ներկայացրել խնդիրները։

«Այժմ դեռևս նոր լուծումներ չկան, քննարկումների փուլ է, մտածում ենք բազմավեկտոր գյուղատնտեսության զարգացման մասին, այդ դեպքում էլ ոռոգման համակարգերի խնդիրներ պետք է լուծվեն։ Պետք է մտածել ուրիշ ուղղությունների մասին՝ թռչնաբուծություն, ճագարաբուծություն»,-ասաց նա։

Ինչ վերաբերում է անվտանգային խնդիրներին, համայնքապետն ասաց, թե այս պահին ամեն ինչ կարգին է, բնակիչների մոտ խուճապային տրամադրություններ չկան։

Հիշեցնենք, որ Հայաստանի ու Ադրբեջանի միջև սահմանազատման աշխատանքների հետևանքով տարածքային կորուստներ են եղել նաև Սյունիքի մարզի մի շարք համայնքներից։