Աջափնյակի թաղապետի պաշտոնանկության պատճառը

Երեկ հայտնի դարձավ, որ Աջափնյակ վարչական շրջանի ղեկավար Գևորգ Բաբայանն աշխատանքից ազատվելու դիմում է ներկայացրել: Նա հայտարարություն է տարածել` ներողություն խնդրելով չարված աշխատանքի համար և հաջողություններ մաղթելով նոր թաղապետին: Նախկին թաղապետը, սակայն, չի մանրամասնել, թե ինչու է դիմում գրել: Գևորգ Բաբայանի աշխատանքից ազատվելու հետ կապված Factor.am-ին ուշագրավ մանրամասներ են հայտնի դարձել:

Մեր աղբյուրների փոխանցմամբ՝ Աջափնյակի թաղապետը հրաժարական է տվել ապօրինի շինարարության վերաբերյալ կազմված ակտը «կորցնելու» համար: Մասնավորապես, նա Աջափնյակ համայնքի ազդեցիկ բնակիչներից մեկի՝ Շինանյութի կամ Ջերմուկի Նորո անուններով հայտնի գործարարի հարազատներին 17-րդ թաղամասում երեք առանձնատուն կառուցելու հնարավորություն է տվել՝ առանց թույլտվության:

Աջափնյակ վարչական շրջանի աշխատակազմի տեսուչը նախորդ տարվա սեպտեմբեր-հոկտեմբերին այդ առանձնատներից մեկի հետ կապված խախտումները բացահայտել է և դրա վերաբերյալ արձանագրություն է կազմել, սակայն Բաբայանը տեսուչից վերցրել է արձանագրությունը և նրան ազատել աշխատանքից: Այդ արձանագրության կրկնօրինակը, սակայն, հայտնվել է Երևանի քաղաքապետարանում, որտեղից էլ ուղարկվել Ոստիկանություն: Այժմ Ոստիկանության Մաշտոցի բաժնում նյութեր են նախապատրաստվում:

Մեզ հայտնի դարձավ, որ արդեն հարցաքննվել են Գևորգ Բաբայանը և աշխատանքից ազատված տեսուչը: Տեղեկությունների շուրջ Factor.am-ը փորձեց մեկնաբանություն ստանալ Գևորգ Բաբայանից, բայց նա մեր տևական զանգերն անպատասխան թողեց: Իսկ ահա Ոստիկանությունից հաստատեցին մեր տեղեկությունները և փոխանցեցին, որ քաղաքապետարանից փաստատթղթեր են ստացել, որոնց հիման վրա նյութեր են նախապատրաստվում: