Ինչո՞ւ են եվրոպական անձնագրերը կարմիր

Կենսաչափական նոր անձնագրերը, որ Հայաստանում կներդրվեն այս տարվա աշնանից, լինելու են կարմիր։ Ըստ վարչապետ Փաշինյանի՝ այդ երանգը միջազգայնորեն ամենատարածվածներից է։

Ներքին գործերի նախարար Արփինե Սարգսյանն էլ իր հերթին ընդգծել է, որ այս փոփոխությունները կարևոր են նաև ԵՄ-ի հետ վիզաների ազատականացման գործընթացն ավարտին հասցնելու համար։ Նշենք, որ ԵՄ անդամ երկրների անձնագրերը (բացառությամբ Խորվաթիայի) կարմիր են։ ԵՄ ստանդարտները նախատեսված են ապահովելու տեսողական և տեխնիկական միասնություն։

Անձնագրերը պարտադիր կենսաչափական (բիոմետրիկ) են. դրանք պարունակում են էլեկտրոնային չիպ, լուսանկար ու մատնահետքեր և համապատասխանում են ICAO Doc 9303 միջազգային ստանդարտին։ Փաստաթղթերն ունեն 32 էջ և B7 չափս։ Այս միասնական չափանիշները զգալիորեն հեշտացնում են սահմանային վերահսկողությունը։

Radar Armenia-ն ներկայացնում է եվրոպական մի քանի երկրների կենսաչափական անձնագրերի առանձնահատկությունները․

Իսպանիա

Իսպանիայի կենսաչափական անձնագիրն ունի մուգ կարմիր գույն։ 1980-ականներից սկսած՝ ԵՄ անդամ երկրները համաձայնեցրել են անձնագրերի դիզայնի միասնականացումը՝ սահմաններում ճանաչելիությունը հեշտացնելու և այն ԵՄ խորհրդանիշ դարձնելու համար։ Կազմի վրա գրված է «European Union» (Եվրոպական Միություն) և «España» (Իսպանիա), պատկերված է նաև երկրի զինանշանը։ Անձնագրի վավերականության ժամկետը 10 տարի է։

Հունաստան

Հունաստանի կենսաչափական անձնագիրը նույնպես մուգ կարմիր է (երկիրը ԵՄ անդամ է 1981 թ.-ից)։ Շապիկի վերնամասում գրված է «ΕΥΡΩΠΑΪΚΗ ΕΝΩΣΗ» և «ΕΛΛΗΝΙΚΗ ΔΗΜՈΚΡΑՏΙΑ», կենտրոնում պատկերված է ազգային զինանշանը, իսկ ներքևում՝ հունարեն «ΔΙΑΒΑΤΗΡΙΟ» (անձնագիր) բառը։ 2006 թվականից անձնագրերը բիոմետրիկ են, իսկ 2024 թվականից ներդրվել են նոր սերնդի անվտանգության տարրեր՝ պոլիկարբոնատային տվյալների էջ և առաջադեմ հոլոգրամներ։ Մեծահասակների համար վավերականության ժամկետը 10 տարի է։

Ֆրանսիա

Ֆրանսիայի կենսաչափական անձնագիրը ևս բորդո գույնի է (bordeaux-red)։ Շապիկին նշված է «UNION EUROPÉENNE», «RÉPUBLIQUE FRANÇAISE» և «PASSEPORT»։ Կենտրոնում տեղադրված է Ֆրանսիայի ազգային զինանշանը։ Անձնագիրը կենսաչափական է և տրամադրվում է 10 տարի ժամկետով։

Գերմանիա

Գերմանիայի Դաշնային Հանրապետության անձնագիրը նույնպես մուգ բորդո է։ Շապիկի վրա գրված է «EUROPÄISCHE UNION», «BUNDESREPUBLIK DEUTSCHLAND» և «REISEPASS»։ Կենտրոնում պատկերված է Գերմանիայի զինանշանը՝ դաշնային արծիվը (Bundesadler)։ Այն համարվում է անվտանգության ամենաբարձր մակարդակ ունեցող անձնագրերից մեկն աշխարհում։ Պարունակում է էլեկտրոնային չիպ և տրվում է 10 տարի ժամկետով (մեծահասակների համար)։

Ռուսաստան

Չնայած՝ Ռուսաստանը չի հանդիսանում ԵՄ անդամ երկիր, սակայն ունի կարմիր կենսաչափական անձնագիր (загранпаспорт)։  Գույնը պայմանավորված է հիմնականում խորհրդային ժառանգությամբ։ Սովետական տարիներին (մասնավորապես, 1975 թվականից) անձնագրերի և պաշտոնական փաստաթղթերի կազմը եղել է մուգ կարմիր․ այդ գույնը համարվում էր կոմունիզմի, հեղափոխության և սովետական իշխանության հիմնական խորհրդանիշ։  Խորհրդային Միության փլուզումից հետո Ռուսաստանը պահպանել է ավանդույթը և շարունակել թողարկել կարմիր անձնագրեր։