Ասողին լսող է պետք կամ երբ իշխանությունը կորցնում է իրականության զգացողությունը

Երբ շատ-շատ վաղուց, իսկ ավելի կոնկրետ այս տարվա մայիսի 19-ին զգուշացնում, հորդորում էինք, որ դատարանների շենքերը չի կարելի շրջափակել, որ չի կարելի խոչընդոտել դատարանների աշխատանքը, որ չի կարելի դատարան մտնող դատավորին քաշքշել, նեղ անձնական կամ թիմային շահեր չէինք հետապնդում, այլ առաջնորդվում էինք պետության շահով:

Մենք, բոլոր նրանք, ովքեր պետության շահը վեր են դասում խմբակային շահից, չէինք ցանկանում, որ մեր երկիրն ավելի խոցելի, ավելի քաոսային դառնա: Չէինք ցանկանում, որ Վենետիկի կամ մեկ այլ հանձնաժողով, մեղմ ասած, դիտողություն անի մեր երկրին, դրանով իսկ թուլացնելով, նվազեցնելով Հայաստանի միջազգային հեղինակությունը:

Այնպես որ, յուրաքանչյուր քննադատություն մի դիտարկեք, որպես թշնամական, որպես սեւական կամ հակահեղափոխական: Մենք ընդամենը չենք ցանկանում, որ մեր երկիրն աջ ու ձախ ապտակներ ստանա:

Ի դեպ, մեր հասարակությունը, ի տարբերություն շատ պաշտոնյաների, հասկացավ, որ դատարանի շրջափակումը ոչ ժողովրդի, ոչ էլ Հայաստանի շահերից է բխում: Դրա վառ վկայությունն էլ այն է, որ շրջափակմանը մասնակից դարձավ մոտ հազար հոգի՝ հիմնականում մեծ եւ փոքր պաշտոնյաներ, պատգամավորներ եւ նրանց օգնականներ:

Իսկ հիմա ընդամենը հետեւություն արեք Վենետիկի հանձնաժողովից եւ ոչ թե ասեք, թե Վենետիկի հանձնաժողովը չի հասկանում, թե Հայաստանում ինչ է կատարվում կամ թե այդ փաստաթուղթը կապ չունի «Վենետիկի» հետ, կամ թե այն մի համարեք ոչ պատշաճ փաստաթուղթ:

Վերջապես հասկացեք, չի կարելի դուրս գալ բոլորի դեմ՝ հասարակության, Ռուսաստանի, Արեւմուտքի, այս կամ այն միջազգային կառույցների եւ հանձնաժողովների:

Վերադարձեք իրականություն, լսեք եւ միջազգային հանձնաժողովներին, եւ տեղական «հանձնաժողովներին» եւ հետեւություններ արեք: Օրինակ, դադարեցրեք Ռոբերտ Քոչարյանին ենթարկել քաղաքական հետապնդման: Այս հետապնդումը չի բխում ոչ մեր պետության, ոչ ժողովրդի եւ նույնիսկ օրվա իշխանությունների շահերից:

Սխալվել կարող են բոլորը, բայց միայն ուժեղներն են ընդունում սխալները եւ ուղղում դրանք: Ուղղեք սխալները, քանի դեռ ունեք այդ հնարավորությունը: Եւ հասկացեք, որ եթե այս երկրում սեւեր կան, ապա դրանք այն պաշտոնյաներն են, ովքեր սխալ եւ իրականութփյանը չհամապատասխանող տեղեկություններ եւ փաստեր են տրամադրում եւ դրդում հակաիրավական գործողությունների:

Գեղամ Նազարյան

Top-News.am