Ռուսաստանն արգելել է «Ջերմուկի» ևս 1,1 մլն շշի վաճառքը

Ռոսպոտրեբնադզորի պահանջով «Честный знак» («Ազնիվ նշան») պիտակավորման համակարգն արգելափակել է Հայաստանում արտադրված «Ջերմուկ» հանքային ջրի ևս գրեթե 1,1 միլիոն շշի վաճառքը: Այս մասին ռուսական РБК-ին հայտնել է Ռոսպոտրեբնադզորի մամուլի ծառայությունը։

Սահմանափակումները կիրառվել են 2025 թվականի հոկտեմբերի 23-ից մինչև 2026 թվականի մարտի 27-ն արտադրված նոր խմբաքանակների ստուգման արդյունքում: Ռոսպոտրեբնադզորը հայտնել է, որ նմուշներում հայտնաբերվել են պարտադիր պահանջների խախտումներ: Արգելքը սահմանվել է քաղաքացիների կյանքին և առողջությանը հնարավոր վնասը կանխելու նպատակով: Ընդհանուր առմամբ, արգելափակվել է արտադրության ինը տարբեր ամսաթվերով թողարկված արտադրանքը։

«Պիտակավորման համակարգը ծառայում է որպես սպառողների պաշտպանության հուսալի թվային մեխանիզմ: Կարգավորող մարմնի հարցումը ստանալուց հետո մենք անհապաղ կասեցրել ենք արտադրանքի յուրաքանչյուր միավորի վաճառքն ամբողջ երկրում. սպառողները պարզապես չեն կարողանա գնել պոտենցիալ վտանգավոր արտադրանք: Համակարգը վերահսկում է շուկայի ամբողջ շղթան՝ թողարկումից մինչև իրացում: Սա մեզ թույլ է տալիս անմիջապես մեկուսացնել խախտումներով հայտնաբերված ապրանքները և ապահովել, որ խանութների դարակներին հայտնվեն միայն անվտանգ ու ստուգված ապրանքներ», - ասել է «Честный знак»-ի օպերատորի գլխավոր տնօրենի տեղակալ Ռևազ Յուսուպովը։

Ավելի վաղ՝ ապրիլի 27-ին, կասեցվել էր 338,000 շշի վաճառքը։ Այսպիսով, ժամանակավոր սահմանափակման տակ գտնվող ապրանքների ընդհանուր թիվը հասել է 1,4 միլիոն միավորի։ Հաղորդվում է, որ մինչև լրացուցիչ ստուգումների ավարտը և համապատասխանության հավաստումը, ապրանքի վաճառքը չի թույլատրվի։