Գյումրեցին աղքատ է եւ հուսահատ, բայց ՀՀԿ-ին ձայն չի տա

Ապրիլին կայանալիք համապետական ընտրություններին ընդառաջ՝ հանրապետության երկրորդ քաղաք Գյումրիում, որն ընդունված է համարել ընդդիմադիր–քաղաքական, թեժ խմորումներ են հասունանում: Եթե հասարակության որոշ շերտերի համար հետաքրքրության թեման շարունակում էր մնալ Սամվել Բալասանյան եւ Մարտուն Գրիգորյան քաղաքական զույգը, ապա հունվարի 30-ին, նախկին քաղաքապետ Վարդան Ղուկասյանի աղմկալի հայտարարությունը՝ «Ծառուկյան դաշինք»-ով ընտրություններին մասնակցելու մասին, շեղեց բոլոր շահագրգիռ անձանց ուշադրությունը:

Քաղաքական ուժերի ակտիվությանը զուգահեռ, ցավոք սրտի, պասիվություն եւ անտարբերություն են ցուցաբերում հոգսաշատ քաղաքացիները:

Առաջիկա խորհրդարանական ընտրությունները գյումրեցիներից շատերի համար բարդ եւ խնդրահարույց են լինելու, քանի-որ առաջին անգամ է կիրառվելու նոր ընտրական օրենսգիրքը: «Վստահաբար կարող եմ ասել՝ մեծ խնդիրների, չհասկացվածության ու անվավեր քվեաթերթերի հսկայական քանակ ենք ունենալու։ Դրա կանխարգելման համար մեզ միայն մնում է հմուտ, վերապատրաստված դիտորդներ ունենալ։ Առանձնապես հույսս ոչ մեկի հետ չեմ կապում, որովհետեւ չկա այն ընդդիմադիր ուժը, որին վստահաբար կարող եմ ասել՝ դուք կփրկեք Հայաստանը այս աղետալի վիճակից»,-այսպիսի կարծիք ունի դիտորդական գործունեություն ծավալած Էմմա Բաղդասարյանը:

Շատ ընտրողներ էլ չեն կողմնորոշվում ընտրության հարցում՝ պայմանավորված քաղաքական դաշտի անկայուն փոփոխություններով: «Առաջիկա ընտրությունների համար դեռ սպասումների մեջ եմ, որովհետեւ օր օրի նոր դաշինքներ ու նոր մարդիկ են հայտնվում տարբեր կողմերում: Մտածում եմ, որ մենք քաղաքականության մեջ ընդդիմադիր կողմ չունենք, բոլորն էլ նույնն են»,- ասում է ուսանող Դավիթ Ավդալյանը:
Մինչ երիտասարդ ընտրողները սպասում են, որ քաղաքական ուժերը կհստակեցնեն իրենց ռեյտինգային ցուցակները, տարեց եւ անկատար խոստումներ լսած գյումրեցիները որեւէ քաղաքական ուժի հետ իրենց ապագան չեն կապում:

«Ո՞ւմ հետ հույս կապեմ, ո՞վ կգա, կասի՝ արի էս ցրտին լոտո մի ծախի, քեզ լավ գործ եմ տալիս: Առաջ շատ հույս ունեի, բայց սաղ ղեկավարությունը մեռցրավ: Ամեն մարդ իրա աթոռի համար կպայքարե: Ես չեմ տարբերում իշխանական ու ընդդիմադիր՝ երկուսն էլ նույն բանն են, իրար հետ համագործակցում են»,- ասում է այս աշխարհից եւ իշխանություններից դժգոհ Կարապետ Հովհաննիսյանը:

Գյումրեցին նախընտրական խոստումներ միշտ է լսել: Ասել են՝ ապրելու է բարեկեցիկ, անհոգ եւ ապահով Հայաստանում: Սակայն, խոստումը լսել են եւ շարունակել մեծ դժվարությամբ լուծել օրվա հացի խնդիրը ՝ նույնիսկ մուրալով:

«Ընտրվողը մարդկանց տեր չի կանգնի, զինվորներին լավ չեն նայե: Ըննդիմությանը կուզեմ ընտրեմ, բայց իրանք էլ հույս չեն տա: 25 տարի է բարեփոխումների կսպասենք: Ես ստեղ նստե, հացի փող կհավաքեմ, իրանք՝աթոռի կռիվ կենեն»,-եզրափակում է Սիլվա Ղարիբյանը:

Գյումրեցիների մի մասը, չնայած հիասթափությանը, այնուհանդերձ, շարունակում է փնտրել այն քաղաքական ուժին, որին կվստահի եւ կքվեարկի: Գյումրեցին չի ցանկանում փողով քվեարկել, չնայած այդպիսիններն էլ կան: Ոմանք հույսեր են կապում Գագիկ Ծառուկյանի հետ, ոմանք սկսել են ուշադրություն դարձնել Սեյրան Օհանյանին, բայց ցավոք, շատ են նրանք, ովքեր հուսահատված են:

«Ում էլ քվեարկեմ, հաստատ ՀՀԿ-ին չեմ քվեարկի, անկախ նրանից, թե ՀՀԿ-ից ռեյտինգայինով մանկության ընկերս կամ եղբայրս առաջադրված լինի»,- մեզ հետ զրույցում շեշտեց բժիշկ Կարապետյանը:

Դավիթ Կարապետյան

Top-News.am

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)