Պորոշենկոն վստահ է, որ հաղթելու է ընտրություններին` անկախ իր ցածր վարկանիշից

Ուկրաինայի գործող նախագահ, նախագահի թեկնածու Պյոտր Պորոշենկոն, որն իր վարկանիշով զիջում է հիմնական մրցակիցներին, վստահ է, որ հաղթելու է մարտի 31-ին կայանալիք նախագահական ընտրություններին: Այդ մասին Պորոշենկոն ասել է «Украина» հեռուստաընկերությանը տված հարցազրույցում, հաղորդում է ТАСС-ը:

«Ես պատրաստ եմ ճանաչել Ուկրաինայի ժողովրդի հաղթանակը»,- ասել է նախագահի թեկնածուն` պատասխանելով հարցին` պատրաստ է արդյոք ճանաչել այլ թեկնածուի հաղթանակը: Միաժամանակ, նա հավելել է, որ «վստահ է իր հաղթանակի մեջ»:

Պորոշենկոն նշել է, որ ընտրողներն իրենց «արդարացի գնահատականը» կտան այն քայլերին, որոնք արել է իր նախագահության տարիներին: Նա նաև վստահեցրել է, որ ջանքեր կգործադրի, որ քվեարկությունը տեղի ունենա առանց միջադեպերի: «Ես ամեն ինչ կանեմ, որ ընտրությունների օրը հանգիստ անցնի, որ ուկրաինացիների ընտրությունը պաշտպանված լինի և հանրությունը վստահի քվեարկության արդյունքներին»,- ընդգծել է Ուկրաինայի նախագահը:

Հիշեցնենք, որ Ուկրաինայի նախագահի թեկնածուների վարկանիշում առաջատարը շոումեն Վլադիմիր Զելենսկին, ում օգտին, ըստ հարցումների, պատրաստ է քվեարկել ընտրողների մոտ 34 տոկոսը: Երկրորդ տեղում «Բատկիվշչինա» կուսակցության առաջնորդ Յուլիա Տիմոշենկոն է, որն ունի ընտրողների 18.8 տոկոսի աջակցությունը: Ուկրաինայի գործող նախագահ Պյոտր Պորոշենկոյի օգտին պատրաստ է քվեարկել ընտրողների միայն 17.4 տոկոսը: