Ատոմ Ջանջուղազյանն ԱՄՆ դեսպանին ներկայացրել ՀՀ կառավարության բարեփոխումների օրակարգը

ՀՀ ֆինանսների նախարար Ատոմ Ջանջուղազյանն ընդունել է Հայաստանի Հանրապետությունում Ամերիկայի Միացյալ Նահանգների նորանշանակ արտակարգ եւ լիազոր դեսպան Լին Թրեյսիին:

Նախարարությունից NEWS.am-ին հայտնում են, որ նախարարը շնորհավորել է դեսպանին պաշտոնն ստանձնելու կապակցությամբ եւ բարձր է գնահատել երկու երկրների գործընկերային հարաբերությունները: Նա դեսպանին է ներկայացրել ՀՀ կառավարության ծրագրով սահմանված առաջնահերթություններն ու բարեփոխումների օրակարգը: Ջանջուղազյանը նշել է, որ այս համատեքտում նախարարությունն ունի հավասարակշռության պահպանման եւ ֆինանսական կարգապահության ապահովման գործառույթ, որը թույլ կտա առավելագույն արդյունք ստանալ ծախված միջոցների դիմաց:

Հանդիպման ընթացքում կողմերն անդրադարձել են ֆիսկալ կանոններին, հարկային համակարգի փոփոխություններին, պետական պարտքի կայունացմանը, ինչպես նաեւ դրամավարկային եւ հարկաբյուջետային քաղաքակության միջոցով մակրոտնտեսական ռիսկերի կառավարելիությանը, Արժույթի միջազգային հիմնադրամի հետ հաջող բանակցությունների ընթացքին: Վերջինիս առնչությամբ դեսպանն ընդգծել է, որ դա կնպաստի Հայաստանի նկատմամբ միջազգային ֆինանսական հանրության վստահության ամրապնդմանը:

Քննարկվել են նաեւ երկրում ներդրումային եւ գործարար բարենպաստ միջավայրի ստեղծման նախապայմանները եւ հայ-ամերիկյան համագործակցության ընդլայնումն այս ուղղությամբ: