«Ռեալում» համոզված են, որ Մոուրինյուն կվերադառնա

Պորտուգալացի մարզիչ Ժոզե Մոուրինյուն կարող է կրկին գլխավորել Մադրիդի «Ռեալը»:

The Telegraph-ը գրում է, որ «Ռեալում» 100% վստահ են, որ 56-ամյա մասնագետը, որի վերջին աշխատավայրը «Մանչեսթեր Յունայթեդն» էր, համաձայնելու է վերադառնալ Մադրիդ: Աղբյուրի տեղեկություններով՝ անձամբ Մոուրինյուն ևս ցանկանում վերադառնալ նախկին ակումբ:

Վերջերս beIN Sports-ին տված հարցազրույցում պորտուգալացի մասնագետը խոսոտվանել էր, որ դեմ չի լինի կարիերայի շարունակության նման տարբերակին և հպարտություն է զգում, որ իր անունը կրկին կապում են «Ռեալի» հետ:

Կողմերը դեռ չեն սկսել բանակցությունները, սակայն, ամենայն հավանականությամբ, նախքան ընթացիկ մրցաշրջանի ավարտը համաձայնության կգան:

Հիշեցնենք, որ Մոուրինյուն «Ռեալը» գլխավորել է 2010-2013 թվականներին՝ դառնալով Իսպանիայի չեմպիոն, գավաթակիր և սուպերգավաթակիր:

Վերջին շաբաթվա ընթացքում «Ռեալը» դուրս մնաց Իսպանիայի Գավաթի խաղարկությունից և Չեմպիոնների լիգայից՝ զիջելով «Բարսելոնային» և «Այաքսին»: Պրիմերայի ընթացիկ խաղարկության 26-րդ տուրից հետո «Ռեալն» ունի 48 միավոր և զբաղեցնում է մրցաշարային աղյուսակի երրորդ հորիզոնականը՝ առաջատար «Բարսելոնային» զիջելով 12 միավորով: