«Ռեալը» պարտվել է Չեմպիոնների լիգայի` առանց Ռամոսի անցկացրած 4-րդ խաղում անընդմեջ

Չեմպիոնների լիգայի 1/8 եզրափակչի պատասխան խաղում Մադրիդի «Ռեալը» սեփական հարկի տակ ընդունել է Ամստերդամի «Այաքսին» և 1:4 հաշվով ջախջախիչ պարտություն է կրել:

Հանդիպմանը որակազրկման պատճառով չի մասնակցել «Ռեալի» ավագ Սերխիո Ռամոսը: Իսպանացին երկու խաղով որակազրկվել էր «Այաքսի» հետ առաջին խաղում միտումնավոր դեղին քարտ ստանալու համար:

Այսպիսով, «սերուցքայինները» Չեմպիոնների լիգայում առանց Ռամոսի անցկացրած վերջին 4 խաղում պարտվել են: Նախորդ մրցաշրջանում «Արքայական ակումբը» պարտվեց «Յուվենտուսին» (1:3), իսկ այս մրցաշրջանում` երկու անգամ ԲԿՄԱ-ին (0:1, 0:3) և «Այաքսին»:

Հիշեցնենք` 2010 և 2013 թվականներին Ռամոսը դարձյալ միտումնավոր դեղին քարտեր էր ստացել, որոնք թույլ էին տվել բաց թողնել հաջորդ` մրցաշարային նշանակություն չունեցող խաղերը:

Ամստերդամում կայացած առաջին խաղում Սոլարիի թիմը 2:1 հաշվով հաղթանակ էր տարել: Այսպիսով, «Այաքսը» դուրս է եկել Չեմպիոնների լիգայի քառորդ եզրափակիչ, իսկ «Ռեալն» ավարտել է ելույթները եվրոպական ակումբային ֆուտբոլի ամենահեղինակավոր մրցաշարում: