Մոդրիչ. «Ռեալը» զգում է Ռոնալդուի պակասը

Մադրիդի «Ռեալի» խորվաթ կիսապաշտպան Լուկա Մոդրիչը խոստովանել է, որ Արքայական ակումբը զգում է Թուրինի «Յուվենտուս» տեղափոխված պորտուգալացի հարձակվող Կրիշտիանու Ռոնալդու պակասը:

«Իհարկե, ունենք Ռոնալդուի կարիքը: Այդպիսի խաղացողի կկարոտեր ցանկացած ակումբ: Նրան փոխարինել գրեթե անհնար է: Երբ նա տեղափոխվեց «Յուվենտուս», ակումբը ցանկանում էր, որ մյուս ֆուտբոլիստները կատարեին նրա գործառույթը՝ բաժանելով պարտականությունները: Մեզ անհրաժեշ էին 2 կամ 3 խաղացողներ, որոնք կխփեին 10, 15 կամ 20 գոլ, սակայն մենք չունեինք այդպիսի ֆուտբոլիստներ: Դա մեր գլխավոր խնդիրն է այս մրցաշրջանում: Ունենք հրաշալի ֆուտբոլիստներ, ակումբը վստահում է Բեյլին, Բենզեմային, Ասենսիոյին, Դիասին ու Վինիսիուսին: Ոչ միշտ է ամեն բան դասավորվում այնպես, ինչպես ցանկանում ես, սակայն «Ռեալը» կվերադառնա բարձունքին»,- 2018թ. աշխարհի լավագույն ֆուտբոլիստի խոսքը մեջբերում է AFP-ն:

Հիշեցնենք, որ մարտի 5-ին «Ռեալը» Չեմպիոնների լիգայի 1/8 եզրափակիչում կընդունի Ամստերդամի «Այաքսին», որին առաջին խաղում հաղթել է 2:1 հաշվով: Հանդիպումը կսկսվի Երեւանի ժամանակով կեսգիշերին: