Պենտագոնը պատրաստվում է ստեղծել լազերային զենք զրահամեքենաների համար

Պենտագոնը պատրաստվում է ստեղծել բարձր էներգիայի լազերային զենք Stryker զրահապատ մեքենայի շասսիի վրա. այդ առիթով պետգնումների կայքում հրապարակվել է ընկերությունների վերաբերյալ տեղեկատվություն ստանալու հայտը, որոնք կարող են ստեղծել «փոքր եւ հուսալի» մոդուլներ այդ նպատակն իրագործելու համար, հաղորդում է RT-ը:

Նշվում է, որ համապատասխան հրամանն արձակվել էր ԱՄՆ-ի Զինուժի Ռազմավարական հրամանատարության կից տիեզերական եւ հակահրթիռային պաշտպանության վարչության կողմից: Ամերիկյան զինվորականներին մոդուլներն անհրաժեշտ են բազմանպատակային բարձր էներգիայի լազերային զենքի՝ HEL (High Energy Laser)-ի ենթակառուցվածքների համար:

Այդկերպ, վարչությունում պատրաստվում են ուսումնասիրել մարտական գործողությունների ընթացքում լազերի կիրառման արդյունավետության բարձրացման հեռանկարները: Մասնավորապես, Պետնագոնին հետաքրքրում են լազերային ճառագայթի կառավարման հնարավորություններն ու լազերային սարքավորման սառեցման միջոցները:

Հայտի մեջ նշված է, որ ժամանակակից փորձարարական լազերային սարքավորումը համալրված է 50 կվտ հզորությամբ գեներատորով եւ տեղադրված է ծանր բեռնատարի վրա՝ «ուժեղացված շարժունակությամբ» եւ 14.5 տոննա բեռնունակությամբ: Ապագայում զինվորականները մտադիր են ստանալ ավելի փոքր HEL համալիրներ Stryker միջին տակտիկական զրահամեքենաների վրա օգտագործելու համար:

Ինչպես նշվում է, վարչությունում ցանկանում են, որ HEL-ը գործի դնելու ընթացքը չգերազանցի 5 րոպեն, իսկ կրակոցների միջեւ ժամանակահատվածը կազմի 0.02 վայրկյան: