Չէինք պատկերացնում, որ նման աղմուկ կբարձրանա. Նազենի Ղարիբյան

ՀՀ մշակույթի նախարարի պարտականությունները կատարող Նազենի Ղարիբյանը այսօր մամուլի ասուլիսին անդրադարձավ ՀՀ մշակույթի նախարարության ՊՈԱԿ-ների գործունեության վերլուծությանը վերաբերող տեղեկանքի շուրջ ծավալված քննարկումներին և նշեց, որ չէր պատկերացնում, որ այսքան աղմուկ, կցկտուր տեղեկություններ կհայտնվեն, որոնք տարատեսակ մեկնաբանությունների տեղի կտան:

«Սա մի կաթիլ մեղրի պատմությունը կամ փչացած հեռախոսի պատմությունն է հիշեցնում և կարծում եմ, որ խնդիրը բառերի ընտրության հետ է կապված: Խոսքը կառավարության հանձնարարականների մասին է և այդպիսի առաջադրանք ստանում ենք գրեթե ամեն օր: Հանձնարարական ստացվել էր ուսումնասիրելու, վերլուծելու ՊՈԱԿ-ների գործունեության դաշտը, թե ինչպիսին է ՊՈԱԿ-ների վիճակը և տալ առաջարկություն՝ օպտիմալացման շրջանակներում»,-ասաց նա և նշեց, որ հանձնարարականը ուղղված էր նրան, որ առաջնորդվեն ոչ թե խնայողություններով, կրճատումներով, այլ արդյունավետության հրամայականով:

«Խոսքը սևագիր տեղեկանքի մասին, այդ թուղթը մեզ համար առաջին վերլուծություն է, որի արդյունքն ուղարկվել է կառավարություն, բայց դա չի նշանակում, որ կառավարությունը պետք է ընդունի ի գիտություն և մարտի 5-ին որոշում կայացնի»,-ասաց նա և նշեց, որ կան մեկ-երկու ՊՈԱԿ-ներ, որոնք կարող են միավորվել և այնպես չէ որ, եթե մի ՊՈԱԿ փակվի, այլընտրանք չեն առաջարկելու:

Նա հայտնեց, որ ունեն աշխատանքային խումբ, որը զբաղվում է օրենսդրական դաշտի կարգավորումներով: Նազենի Ղարիբյանը հայտնեց, որ ՊՈԱԿ-ների տնօրեններին երկուշաբթի հրավիրել են քննարկման: