ՌԴ ԱԳՆ-ն՝ ՀԱՊԿ գլխավոր քարտուղարի հարցի լուծման մասին. այդ հարցը կենսունակ է, բայց դրա վրա աշխատում են

ՀԱՊԿ գլխավոր քարտուղարի նշանակման հարցը հեշտ հարց չէ, դրա վրա աշխատանքները շարունակվում են, «ՌԻԱ Նովոստի»-ին ասել է ՌԴ ԱԳ փոխնախարար Գրիգորի Կարասինը:

«Սա հիպոթետիկ հարց է, հեշտ հարց չէ: Ամենագլխավորն այն է, որ ՀԱՊԿ-ը շարունակել է արդյունավետորեն գործել: Հիմա կա կազմակերպության գլխավոր քարտուղարի պաշտոնակատար: Կհասնենք նրան, որ այս կառույցը շարունակի դինամիկ զարգանալ եւ պատասխանատվության աշխարհագրական ոլորտում անվտանգություն ապահովել: Ինչ վերաբերում է հարցին, թե ինչպես կլուծվի ՀԱՊԿ գլխավոր քարտուղարի հետ կապված խնդիրը, ապա դա կենսունակ հարց է, բայց դրա վրա աշխատում են»,- ասել է Կարասինը՝ պատասխանելով այն հարցին, թե մինչեւ 2020 թվականը արդյոք գլխավոր քարտուղար կնշանակվի՞՝ կապված Հայաստանի անզիջում դիրքորոշման հետ, եւ արդյոք նման իրավիճակը Մոսկվային ձեռնտո՞ւ է:

Կարասինը ներկայումս Պրահայում է, որտեղ մասնակցել է Վրաստանի վարչապետի հատուկ ներկայացուցիչ Զուրաբ Աբաշիձեի հետ բանակցությունների հերթական ռաունդին:

ՀԱՊԿ-ի գլխավոր քարտուղարի պաշտոնը թափուր է մնացել, երբ 2018 թվականին քրեական հետապնդման պատճառով Հայաստանի ներկայացուցիչ Յուրի Խաչատուրովն ազատվել էր աշխատանքից: ՀԱՊԿ-ի գլխավոր քարտուղարի պաշտոնակատար է նշանակվել Վալերի Սեմերիկովը: Հայաստանը պնդում է, որ ղեկավար պաշտոնը պետք է զբաղեցնի Երեւանի ներկայացուցիչը մինչեւ 2020 թվականը: Մինչդեռ, ինչպես ավելի վաղ հայտնել էր Ղազախստանի նախագահ Նուրսուլթան Նազարբաեւը, նոյեմբերի 8-ին Աստանայում կայացած գագաթնաժողովի ժամանակ որոշվել էր, որ այժմ ՀԱՊԿ-ի գլխավոր քարտուղարի պաշտոնը պետք է զբաղեցնի Բելառուսի ներկայացուցիչը:

Բելառուսի նախագահ Ալեքսանդր Լուկաշենկոն դեկտեմբերի 21-ին աշխատանքային հանդիպում է անցկացրել երկրի Անվտանգության խորհրդի պետքարտուղար Ստանիսլավ Զասի հետ եւ ստորագրել ՀԱՊԿ-ի Կոլեկտիվ անվտանգության խորհրդի որոշման նախագիծը նրան կազմակերպության գլխավոր քարտուղար նշանակելու մասին: Ավելի վաղ Զասն իր նշանակումը համաձայնեցնելու համար արդեն այցելել էր Ղրղզստան, Ղազախստան, Տաջիկստան եւ Ռուսաստան: Ընդ որում՝ Երեւանում հաղորդել են, որ Զասի այցը Հայաստան չի ծրագրվում: Զասն ինքը նշել է, որ պատրաստ է ցանկացած ժամանակ այցելել Հայաստան, հանդիպել վարչապետի, արտաքին գործերի նախարարի եւ պաշտպանության նախարարի հետ: Նա նշանակման վերաբերյալ կոնսենսուսի հույս է հայտնել: