Մխիթարյանը գոլ է խփում, գոլային փոխանցում կատարում, բայց դա հայերին հետաքրքիր չէ

Անգլիական Պրեմյեր լիգայի 27-րդ տուրում Լոնդոնի «Արսենալը» Հայաստանի հավաքականի կիսապաշտպան Հենրիխ Մխիթարյանի գոլի ու գոլային փոխանցման շնորհիվ 2:0 հաշվով տնային հաղթանակ տարավ «Սաութհեմփթոնի» նկատմամբ:

Հետաքրքիրն այն է, որ պարզվում է, որ «Արսենալի» եւ այնտեղ հանդես եկող Հենրիխ Մխիթարյանի խաղը Պրեմյեր լիգայի խաղերը հեռարձակող հեռուստաալիքին եւ ֆուտբոլասերների ութսուն տոկոսին չի հետաքրքրում:

Սա մեր տխուր եւ մտահոգիչ իրականությունն է, որը մեզ լուրջ մտորումների տեղիք է տալիս: Այնպիսի տպավորություն է, կարծես Մխիթարյանի կարգի առնվազն մի քսան խաղացող ունենք, որ նրա մասնակցության խաղն էլ չենք ցուցադրում:

Ինչ վերաբերում է խաղին, ապա լոնդոնյան ակումբն ակտիվ սկսեց խաղը եւ 6-րդ րոպեին հակագրոհի արդյունքում բացեց հաշիվը: Հենրիխ Մխիթարյանի հարված-փոխանցումից հետո գնդակը հայտնվեց ֆրանսիացի հարձակվող Ալեքսանդր Լյակազեթի մոտ, որը հարմար դիրքից գեղեցիկ եւ հնարամիտ հարվածով գրավեց դարպասը: 17-րդ րոպեին հաշիվը կրկնապատկեց Մխիթարյանը, որը 5-րդ գոլը խփեց Անգլիայի ընթացիկ առաջնությունում: 

Հենրիխ Մխիթարյանը 15-րդ հանդիպումն անցկացրեց ընթացիկ առաջնությունում եւ կատարեց նաեւ երկրորդ արդյունավետ փոխանցումը: Նա անցկացրեց ամբողջ հանդիպումը:

Տուրի կենտրոնական խաղում «Մանչեսթեր Յունայթեդն» ընդունեց «Լիվերպուլին»: Թիմերը բաժանվեցին գոլազուրկ ոչ ոքիով:

Այս հաղթանակից հետո «Արսենալը» շրջանցեց «Մանչեսթեր Յունայթեդին» եւ 53 միավորով բարձրացավ չորրորդ տեղ: «Լիվերպուլը» 66 միավորով գլխավորում է մրցաշարային աղյուսակը եւ մեկ միավոր է առաջ երկրորդ տեղում գտնվող «Մանչեսթեր Սիթիից»:

1 Լիվերպուլ                    27 20 6 1 59 15 44 66
2 Մանչեսթեր Սիթի         27 21 2 4 74 20 54 65
3 Տոտենհեմ Հոսպուր      27 20 0 7 55 27 28 60
4 Արսենալ                       27 16 5 6 55 37 18 53
5 Մանչեսթեր Յունայթեդ 27 15 7 5 52 35 17 52
6 Չելսի                             26 15 5 6 45 29 16 50