«Ահա եւ վերջ»,- ասաց Գալուստ Սահակյանը կամ Լիլիթ Մակունցի մտքի թռիչքները

«Ահա եւ վերջ»,- ասաց Գալուստ Սահակյանը լսելով Լիլիթ Մակունցի մտքի վերջին գոհարները: Պարզվում է՝ կառավարող կուսակցության խորհրդարանական խմբակցության ղեկավար Լիլիթ Մակունցը վստահ է, որ իր նշանակումը քննադատաբար ընդունողները համոզված են, որ խմբակցության ղեկավարը պետք է լինի հաղթանդամ կամ արտաքնապես գեղեցիկ:

SHANTNEWS.am-ի հետ այսօրվա զրույցում նա նշել է, որ խնդիր չի տեսնում մեծ խմբակցություն ղեկավարելու մեջ նույնիսկ այն դեպքում, երբ կարող է կարծիք լինել, թե խմբակցության ղեկավարը պետք է հաղթանդամ լինի։

«Կարծում եմ՝ ճիշտ չի լինի առաջնորդվել ընդհանրապես հաղթանդամության կամ չգիտեմ՝ արտաքին տեսքի սկզբունքներով։ Էստեղ բոլորովին այլ գործառույթներ են, որոնք սահմանվում են թե՛ կանոնակարգ օրենքով, թե՛ խմբակցության կանոնադրությամբ՝ խմբակցության ղեկավարի դերը, լիազորության շրջանակները»,- նշել է Մակունցը։

Ստիպված ենք հատուկ Մակունցի համար նշել՝ որեւէ մեկի մտքով անգամ չի անցել, որ խմբակցության ղեկավարը պետք է լինի արտաքնապես գեղեցիկ կամ հաղթանդամ: 

Պարզապես շատ նորմալ է, երբ խորհրդարանական խմբակցությունը ղեկավարի քաղաքականության հետ որեւէ կապ ունեցող, որոշակի փորձառությամբ քաղաքական գործիչը, եւ ոչ թե ...

Եւ երբ լսում ես Մակունցի մտորումները, թե ով կարող է լինել խմբակցության ղեկավար, ակամա տխրում ես, անգամ վախենում երկրի վաղվա օրվա համար: Նրա խոսքերով՝ պատգամավոր ընտրվելու համար գործում է տարիքային շեմ, եւ եթե այդ շեմն անցածը կարող է ընտրվել պատգամավոր, ապա կարող է եւ այլ պաշտոններ վարել։ 

Ահա եւ վերջ: Այլեւս ոչինչ ասել հարկավոր չէ, այլեւս այս խմբակցությունից եւ այս քաղաքական ուժից որեւէ սպասելիք չես կարող ունենալ: Եւ մնում է սպասել, թե առաջիկայում լրագրողներն ինչ մեկնաբանություններ են փորձելու ստանալ Մակունցից եւ ինչ նպատակներով:

Աննա Բաղդասարյան

Top-News.am