ԱԱԾ-ին խորհուրդ տվող եւ 16 տարեկան պատանուն ծեծող Երանոսյանների պաշտպան բլոգերը

37 թիվը միայն Ստալինով, Բերիայով եւ Եժովով գլուխ չէր գա, եթե չլիներ «գործ տվողների» եւ մատնիչների հսկա բանակը: Սա անհերքելի փաստ է:

Հայաստանում էլ գաղջ մթնոլորտ չէր հաստատվի, արտագաղթն էլ այս տեմպերի չէր հասնի միայն ՀՀԿ-ի ջանքերով, եթե չլիներ նրանց տարատեսակ ծառայություններ մատուցողների, բարեբախտաբար, դեռ փոքրիկ բանակը, որոնց կարկառուն ներկայացուցիչներից մեկն էլ, այսպես կոչված, բլոգեր Տիգրան Քոչարյանն է:

Ջրառատում տեղի ունեցածն արդեն հայտնի է բոլորին: ՀՀԿ-ական գյուղապետը, նրա ազգական Երանոսյան եղբայրները ծանր են տարել այն փաստը, որ համագյուղացիները համարձակվել են մասնակցել «Օհանյան-Րաֆֆի-Օսկանյան» դաշինքի նախընտրական հանդիպմանը:

Սկզբում սպառնալիքներ են հնչեցրել, հայհոյել, հետո արդեն ատրճանակ պարզել, կրակել, վնասազերծվել: Երկու օր անց էլ ստահակները հարձակվել են 16-ամյա պատանու վրա, իսկ երբ նրան ցանկացել են օգնել հարազատներից երեքը, գյուղապետարանից դուրս է վազել ինքնաձիգով, դանակներով, լոմերով զինված մի հրոսակախումբ եւ հարձակվել նրանց վրա, ինչի հետեւանքով չորս հոգի ստացել են տարբեր աստիճանի մարմնական վնասվածքներ, իսկ նրանցից մեկը նույնիսկ հրազենային վնասվածք:

Եւ այսքանից հետո դեռ գտնվում են ցինիկներ, որոնք կանգնում են ստահակների կողքին, հրապարակավ քննադատում եւ մեղադրում «Օհանյան-Րաֆֆի-Օսկանյան» դաշինքին եւ Ջրառատի ակտիվիստներին: Մարդ որքա՞ն ընկած պետք է լինի, ինչ բարոյական աստիճանի վրա պետք է լինի, որ կանգնի Երանոսյան եղբայրների կողքին:

Բլոգեր Տիգրան Քոչարյանը, որը սիրում է ինքն իրեն Փիղ անվանել, ոչ միայն դարձել է Երանոսյանների պաշտպանը, այլ նույնիսկ հայտարարում է, թե ՕՐՕ դաշինքի նպատակը Հայաստանում զանգվածային բողոքի ակցիաներ ու անկարգություններ կազմակերպելն է:
Այս երիտասարդը, որը հինգ տարի առաջ դատական հայց էր ներկայացրել թերթերից մեկի դեմ, իբր իրեն զրպարտելու եւ վիրավորելու համար, հիմա «Օհանյան-Րաֆֆի-Օսկանյան» դաշինքին ներկայացնում է անհիմն մեղադրանքներ, փորձելով հնարավորին չափ լավ լիզել ՀՀԿ-ի առաջնորդների կոշիկները:

Այս չկայացած երիտասարդն առիթը բաց չի թողնում անգամ վիրավորել Սերժ Թանկյանին եւ Արսինե Խանջյանին: Այստեղ չես կարող չասել՝ այսքան երիտասարդ ու այսքան … Ի դեպ, արդեն հեռավոր, բայց անցյալ չդարձած 37-ին հայտնի գործիչներին, գրողներին, գիտնականներին վիրավորում էին հենց անհայտ եւ մեծ նկրտումներունեցող միջակ երիտասարդները:

«Խիպիշ» բառն օգտագործող անմակարդակ բլոգերը չի դիմացել եւ վիրավորել է մեր հերսներից մեկին՝ Սամվել Բաբայանին՝ նրան եւս անհիմն մեղադրանքներ ներկայացնելով: Զարմանալու կարիք չկա: Ժամանակին գտնվում էին այլ փղիկներ, որոնք վիրավորում եւ անհիմն մեղադրանքներ էին ներկայացնում ժամանակի հերոսներին, ակնկալելով, որ Ստալինը կշոյի իրենց գանգուրները:

Հուզախառն այս փղիկը չի դիմացել եւ կրկին դատարկ եւ անհիմն մեղադրանքներ է ներկայացրել նաեւ ՀՀ-ում ԱՄՆ-ի դեսպանությանը:

Այս անխոնջ բլոգերն ԱԱԾ-ին առաջարկում, ավելի ճիշտ խորհուրդ տալիս մեծ ուշադրություն դարձնել Րաֆֆիի անվտանգության ապահովմանը: Պարզ է, որ բլոգերն այս խորհրդով, փորձ է անում սարսափի մեջ գցել Րաֆֆի Հովհաննիսյանին, բայց ոչ Րաֆֆի Հովհաննիսյանն է վախի մեջ ապրում, ոչ էլ «Օհանյան-Րաֆֆի-Օսկանյան» դաշինքի մյուս առաջնորդները: Այնպես որ, այս հնարքը եւս չի աշխատի:

Եւ ամենավերջում ցանկանում ենք հատուկ շեշտել, որ 16-ամյա պատանու վրա զենք պահողներին, նրան մարմնական վնասվածք պատճառողներին, նախընտրական հանդիպման մասնակիցներին սպառնոցողներին, ակտիվիստների վրա կրոկողներին եւ Երանոսյան եղբայրներին աջակցողներին հանրությունը մի այլ կարգի է վերաբերվում: Հետո չասեք, թե չենք շեշտել այդ մասին:

Top-News.am