ՌԴ դեսպանին կանչել են Ֆինլանդիայի ԱԳՆ

Ռուսաստանի դեսպան Պավել Կուզնեցովին կանչել են Ֆինլանդիայի ԱԳՆ՝ GPS սկանդալի համար՝ տեղեկացնում է ՌԻԱ Նովոստին՝ վկայակոչելով երկրի ԱԳ նախարար Տիմո Սոյնիին, ով համապատասխան հայտարարություն է արել STT գործակալությանը։

Ավելի վաղ ԶԼՄ-ները հայտնել էին, որ հոկտեմբերի 16-ից մինչեւ նոյեմբերի 7-ը ՆԱՏՕ-ի զորավարժությունների ժամանակ խափանումներ են եղել։

Երկուշաբթի օրը Ֆինլանդիայի վարչապետ Յուխա Սիպիլյան հնարավոր համարեց, որ Ռուսաստանը գուցե մասնակից է այդ խափանումներին։ Նմանատիպ հայտարարությամբ երեքշաբթի հանդես եկավ Նորվեգիայի ՊՆ-ն։ ՆԱՏՕ-ի գլխավոր քարտուղար Յենս Սթոլթենբերգն իր հերթին հրաժարվեց մեկնաբանություններից։ Ընդ որում, ռազմաքաղաքական դաշինքում այդ խափանումները վտանգավոր եւ անպատասխանատու են համարել։

Հետագայում հայտնի դարձավ, որ Ռուսաստանն ու Ֆինլանդիան քննարկում են GPS-ի աշխատանքում խափանումները։

Մեկնաբանելով խափանումների հետ կապված իրավիճակը՝ Կրեմլում նշել են, որ ոչինչ չգիտեն դրանց հետ Ռուսաստանի կապի մասին։ Դմիտրի Պեսկովն այդ կապակցությամբ ասել է, թե այսօր Մոսկվայի վրա «բոլոր մահացու եւ այլ մեղքերը» բարդելու միտում կա։

Իր հերթին սենատոր Ֆրանց Կլինցեւիչը նշված խափանումները «տարրական ոչ պրոֆեսիոնալիզմի» արդյունք է անվանել։