Գիտնականները գտել են ճարպակալման անսպասելի օգուտը

Գիտնականները գտել են ճարպակալման անսպասելի օգուտը: Դեյվիսում Քալիֆորնիական համալսարանի գիտնականները պարզել են, որ ճարպակալումը մեծացնում է նոր տիպի հակաքաղցկեղային իմունոթերապիայի արդյունավետությունը, հայտնում է Nature Medicine-ը:

Ուշադրության կենտրոնում է հայտնվել լեպտին հորմոնը, որն արտադրվում է ճարպային բջիջների կողմից եւ կարգավորում է էներգետիկ փոխանակությունը: Պարզվել է, որ այն ազդեցություն է գործում օրգանիզմի իմունային բջիջների՝ Т-քիլերների աշխատանքի վրա: Դրանց գլխավոր ֆունկցիան՝ սեփական օրգանիզմի վնասված բջիջների ոչնչացումը, խախտվում է PD-1 սպիտակուցի մեծ պարունակության դեպքում:

Քաղցկեղային բջիջները խթանում են PD-1-ի արտադրումը, որպեսզի խուսափեն Т-բջիջների հարձակումներից:

Գիտնականները, միաժամանակ, ստեղծել են վերահսկիչ կետերի ինհիբիտորներ (checkpoint inhibitor therapy, CIT), որոնք վերականգնում են Т-բջիջների ֆունկցիան: Հետազոտողները փորձեր են անցկացրել, որոնց ընթացքում պարզվել է, որ CIT-ով բուժելու դեպքում օնկոլոգիայով գեր մկների ապրելիությունը զգալիորեն բարձր է եղել, քան նորմալ քաշով կրծողներինը:

Համանման արդյունք է դիտվել մելանոմայով 250 հիվանդներին CIT-ով բուժելիս: Կլինիկական փորձարկումների ժամանակ առավել լավ թերապեւտիկ էֆեկտ է գրանցվել ավելորդ քաշով կամավորների շրջանում:

Գիտնականները նշում են, որ իրենք ճարպակալումը չեն քարոզում իբրեւ քաղցկեղի դեպքում կանխատեսման բարելավման միջոց: Դրանից բացի, իրենք CIT մեթոդով բուժում ստանալ ցանկացող հիվանդներին կոչ չեն անում հետեւել ճարպերի մեծ պարունակությամբ սննդակարգի: Միաժամանակ, կատարված հայտնագործությունը, նրանց կարծիքով, թույլ կտա առանձին դեպքերում մեծացնել բուժման արդյունավետությունը:

Գիտնականներն առայժմ նախատեսում են հետազոտությունները շարունակել եւ ուսումնասիրել այլ գործոնների դերը, որոնք կարող են ներգործել բուժման արդյունավետության վրա (հիվանդի սեռը, տարիքը, սննդակարգը, աղիքային միկրոբիոտայի բաղադրությունը):