Հենց երդման արարողության օրը Հայկոն ծաղրեց երեւանցիներին

Մենք շատ ենք սիրում մեր երկիրը, եւ ինչպես չսիրենք, եթե հենց մեզ մոտ են ապրում աշխարհի ամենահպարտ քաղաքացիները, որոնք այնքան հպարտ են, խելացի եւ բազմաչարչար, որ առանց անգամ մեկ վայրկյան մտածելու մայրաքաղաքի քաղաքապետի պաշտոնը վստահում են մի միջին մակարդակի դերասանի, որը քաղաքականությունից եւ պետական կառավարման համակարգից այնքան հեռու է, որքան Պապուա Նոր Գվինեան տափողակով հոկեյից:

Անկեղծ լինենք, աշխարհի եւ ոչ մի երկրում չենք գտնի այնպիսի քաղաք, որի քաղաքապետը պաշտոնը ստանձնելու հենց առաջին օրը հրապարակավ կհայտարարի, թե անելու է այն, ինչի դեմ պայքարել է կամ գոնե ցուցադրում էր, թե մասնակցել է: Ավելին, ամբողջ ընտրարշավի ընթացքում հենց այդ պայքարում արված լուսանկարներն էր տարածում, ցույց տալով, թե ինչպիսի պայքարող տեսակ է:

Ճիշտ եք, խոսքը «Հարյուր դրամ» շարժման մասին է, որի մասնակիցները դեմ էին տրանսպորտի գնի բարձրացմանը:

Եւ ահա, հենց երդման արարողությունից հետո Հայկոն, Կարգին Հայկոն, նույն ինքը՝ Հայկ Մարությանը, մեկ անգամ եւս ապացուցելով, որ Հայաստանի նման խորհրդավոր երկիր չկա, վերցրեց եւ հայտարարեց. 

«Հինգ տարվա ընթացքում ամեն ինչի գինը բարձրացել է, բացի տրանսպորտից, սա ինչ-որ տեղ զարմանալի է։ Էն ժամանակ օբյեկտիվ էր, որ ասում էինք մի թանկացրեք, իսկ հիմա որ չի թանկանում, դա արդեն օբյեկտիվ չէ։ Ինձ թվում է, որ նախկին իշխանությունները վախենում էին տրանսպորտի գինը բարձրացնել, որ նոր ալիք չբարձրանա բողոքի։ Բայց միգուցե գինը օբյեկտիվորեն բարձրացնելու տեղ կա։ Բայց շատ կարեւոր է, որ պետք է փոխվի տրանսպորտային միջոցները»։

Այս հայտարարությունից հետո, Մարությանը պետք է առնվազն ներողություն խնդրեր երեւանցիներից այն ժամանակ թյուրիմացության մեջ գցելու համար, եւ իհարկե, հրաժարական տար, բայց քանի որ մենք ապրում ենք աշխարհի ամենալավ, բայց տարօրինակ երկրում, ոչ «Հարյուր դրամ» շարժման մասնակիցները փողոց դուրս եկան, ոչ էլ մյուսները:

Հայկոն ասում է՝ այն ժամանակ օբյեկտիվ էր, որ ասում էինք մի թանկացրեք, իսկ հիմա օբյեկտիվ է, որ թանկացնենք: Այսպես երեւանցիներին չէր ծաղրել դեռ ոչ մի քաղաքապետ: Ավելին, դեռ ոչ մի քաղաքապետ երեւանցիներին չէր ծաղրել: Երեւանցիների երեսին նայելով ասում են՝ տղերք, դուք միամիտ եք, իսկ երեւանցիները դեռ սպասում են, որ Հայկ Մարությանի ղեկավարությամբ կյանքը Երեւանում լավանա:

Հայկ Մարության, այն ժամանակ, երբ դու կցվել էիր «Հարյուր դրամ» ակցիային եւ պահանջում էիր, որ տրանսպորտը չթանկանա, ամեն ինչի գները հինգ եւ ավելի տարիներ թանկացել էին, բայց տրանսպորտը չէր թանկացել: Չի կարելի նայել լրագրողների, երեւանցիների դեմքին եւ այնպիսի մտքեր արտահայտել, որը միայն նոր անեկդոտի համար պետք է հիմք ծառայի:

Եւ արդեն իսկական ծաղր է, երբ անդադար կրկնում են, թե երեւանցիներն են որոշելու, երեւանցիներն են որոշելու: Իսկ դուք ե՞րբ եք որոշելու կամ կարծիք հայտնելու: Ինչքան կարելի է թաքնվել վիրտուալ ժողովրդի հետեւում: Ե՞րբ եք համարձակվելու կարծիք հայտնել:  

Լավ, ենթադրենք ժողովուրդը եկավ եւ ասեց, թե ուզում ենք, որ տրանսպորտն անվճար լինի կամ դեռ վարորդները մեզ փող տան, որ օգտվել են իրենց տրանսպորտային միջոցից: Ի՞նչ եք անելու այս դեպքում: Բավական է արդեն պոպուլիզմի հերն անիծել: Ամեն ինչ իր չափն ու սահմանը ունի: Թարգեք այս ծաղրուծանակը:

Եւ ամենամեծ խնդիրն այն է, որ լռում են նրանք, ովքեր չպետք է լռեն, ում խոսքին սպասում է երեւանցին:

Հակոբ Ասատրյան

Top-News.am