Հայկոյի եւ նրա ֆանատների Երեւանը

Չարենցը ճիշտ է՝ ինչեր ասես, որ չեն անի ամբոխները խելագարված: Նրանք նույնիսկ մայրաքաղաքի քաղաքապետ կարող են դարձնել կատագերգու միջակ դերասանին, որը քաղաքական որեւէ փորձառություն չունի, կառավարման համակարգի հետ որեւէ առնչություն չունի:

Այսօր նա արդեն քաղաքապետ է, իսկ երեկ ասում էր, թե ինչպես է կառավարելու: Ասում էր, որ իրենք ոչինչ չեն որոշելու, ասում էր, թե որոշելու են երեւանցիները: Խոսում էր հանրաքվեներից, ժողովրդի որոշումներից: 

Մի պահ պատկերացրեք, թե ինչ է իրենից ներկայացնելու Հայկոյի Երեւանը: 

Ամիսը մեկ երեւանցին շտապելու է մասնակցել հանրաքվեի` պատասխանելով հետեւյալ հարցերին՝

- Համաձա՞յն եք Ավանում աշխատանքից հեռացնել X մանկապարտեզի դայակ Սոնային, որը սաներից կոնֆետ է վերցրել

- Համաձա՞յն եք աշխատանքից հեռացնել էլցանցի տեսուչ Արշակին, որը կոպտել է կենսաթոշակառու, թափշյա հեղափոխության մասնակից Վալոդին

- Համաձա՞յն եք հանել երթեւեկության կանոնները եւ խաչմերուկներում տեղադրված լուսացույցերն ու տեսախցիկները

- Համաձա՞յն եք, որ Նոր Արեշի փոքրիկ զբոսայգում մի քանի ծառ տնկվի

- Համաձա՞յն եք շենքերից հանել վերելակները, քանի որ դրանք ժամկետանց են, եւ չտեղադրել նորերը, քանի որ դրա համար անհրաժեշտ գումար չկա

- Համաձա՞յն եք բոլորս միասին դուրս գանք փողոց եւ մաքրենք կուտակված աղբը

- Համաձա՞յն եք քանդել սովետական, Լեւոն Տեր-Պետրոսյանի, Ռոբերտ Քոչարյանի եւ Սերժ Սարգսյանի ժամանակ կառուցված շենքերը

- Համաձա՞յն եք կառուցել մետրոպոլիտենի մի քանի կանգառ, բայց թե երբ՝ Աստված գիտի

- Համաձա՞յն եք քանդված շենքերի փոխարեն ոչինչ չկառուցել՝ դրանով իսկ լուծելով քաղաքի կանաչապատման հարցը

- Համաձա՞յն եք Երեւանն անվանափոխենք Հայկավան

Այսպիսին է լինելու Երեւանը ըստ Հայկոյի տեսլականի: Չմոռանանք, որ Հայկոն՝ Հայկ Մարությանն արդեն Երեւանի քաղաքապետն է, եւ նրա օգտին քվեարկել են տասնյակ հազարավոր երեւանցիներ, իսկ թե ինչու են քվեարկել, այդ մասին կասեն հենց իրենք, բայց հետո:

Վարդան Մխիթարյան

Top-News.am