Երբ ասֆալտին են փռում կամ պատերով տալիս սահմանամերձ գյուղերի ղեկավարներին

Համաշխարհային փորձը ցույց է տվել, որ երբ իշխանությունը սկսում է զբաղվել քրեական գործերի հարուցմամբ եւ կենտրոնանալ «պետության վնասարարների» բացահայտմամբ, որպես կանոն տապալում է երկրի զարգացումը եւ առաջընթացը:

Իսկ երբ «ասֆալտին են փռվում» կամ «պատերով զարկվում» սահմանամերձ գյուղերի գյուղապետերը, իրավիճակը դառնում է մտահոգիչ: Մենք մի անգամ այս ճանապարհով անցել ենք1920-ականներին, երբ  գյուղերի ղեկավարները, «կուլակները» բանտարկվում եւ գնդակահարվում էին:

Դժվար է ասել, թե ինչու ենք հիմա ոտք դնում նույն սխալ ճանապարհի վրա: Անկասկած, ավազակները, հանցագործները, օրինախախտները պետք է պատժվեն օրենքի սահմաններում, բայց դա չպետք է արվի, ինչպես ասում են, զուռնա-դհոլով եւ հատկապես չի կարելի փորփրել անցյալը եւ պարզել, թե աղքատ գյուղերի աղքատ գյուղապետերն ինչ յուրացումներ են արել եւ նրանց դեմ քրգործեր հարուցվեն:

Ամբողջ երկրով մեկ հայտարարում են, թե Այգեպարի, սահմանամերձ Այգեպարի գյուղապետը յուրացրել է մանկապարտեզի խաղահրապարակը, համակարգիչը եւ տպիչը, ինչպես նաեւ իրեն է վերցրել բարեգործական նպատակներով գյուղին նվիրած տրակտորը:

Դուք երբեւէ եղե՞լ եք Այգեպարում: Եթե չեք եղել գնացեք եւ գոնե երկու օր ապրեք մի գյուղում, որն ադրբեջանական դիրքերի ուղիղ նշանառության տակ է: Ի դեպ, երբ գնաք, եթե իհարկե գնաք, հարցրեք, թե գյուղապետի, սահման պահող գյուղապետի աշխատավարձը գոնե հարյուր հազար դրամի հասնո՞ւմ է, թե ոչ:

Քրեական գործ հարուցելուց եւ երկրով մեկ մարդուն խայտառակ անելուց առաջ բարի լինեիք գյուղապետին համակարգիչ եւ տպիչ նվիրեիք, ավտոմեքենա նվիրեիք, որ նա էլ գլուխը բարձր քայլեր: Իսկ հիմա նրան Հայաստանով մեկ խայտառակ եք անում:

Տավուշի մարզի մեկ այլ գյուղի՝ Լուսաձորի նախկին գյուղապետին էլ մեղադրում են ազգականին գույքահարկի արտոնություն շնորհելու եւ հավաքարարին մեկ ամսվա աշխատավարձ վճարելու մեջ, այն դեպքում, երբ նա չի ներկայացել աշխատանքի:

Մի՞թե կարծում եք, որ նման քրգործերով երկիրը զարգանալու է, Տավուշի մարզում էլ բիզնես ակտիվություն է նկատվելու: 

Ճիշտ պահն է կանգ առնելու եւ վերադառնալու իրականություն: Տավուշի մարզի գյուղերը գնդակոծվում են: Փոխանակ մտածենք մարզը զարգացնելու, գյուղերին աջակցելու, գյուղապետերին օգնելու մասին, քրեական գործեր ենք հարուցում:

Գաղտնիք չէ, որ ցանկության դեպքում բոլոր գյուղապետերի դեմ էլ կարելի է քրգործեր հարուցել: Բայց մի՞թե դա է զարգացման ճանապարհը: Ընդամենը պետք է խաղի կանոն սահմանել, մտածել գյուղերի զարգացման մասին եւ մտնել զարգացման մի նոր փուլ, եւ ոչ թե կուլակներ հայտնաբերել եւ նրանց Սիբիր աքսորել կամ գնդակահարել:

Գեղամ Նազարյան

Top-News.am