Ավտոճանապարհները դարձել են վտանգավոր, շատ վտանգավոր եւ ռիսկային

Շատերն են նկատել, թե վերջին շրջանում ինչպիսին է երթեւեկությունը Երեւանում եւ հանրապետության մեծ ու փոքր ճանապարհներին: Եթե վթար է լինում նույնիսկ գյուղում, ապա կարելի է պատկերացնել, թե ինչպես են սկսել վարել ավտոմքենաները, երբ հասկացան, որ կամ չեն տուգանում կամ ավտոտեսուչները նախկին եռանդով չեն աշխատում:

Ամենավտանգավորն ու սարսափելին այն է, որ որոշ «դուխով» վարորդներ Երեւանում դուրս են գալիս հանդիպակած երթեւեկելի գոտի եւ վթարային իրավիճակ ստեղծում: Երեկ՝ օգոստոսի 5-ին Աբովյան փողոցից մի հսկա ավտոմքենա շատ մեծ արագությամբ մտավ Թումանյան փողոց, չնայելով լուսացույցին, եւ միայն հրաշքով չսպանեց փողոցն անցնող երիտասարդ զույգին եւ մանկական սայլակում գտնվող նրանց երեխային:

«Դուխով» վարորդները վստահ, որ այլեւս չեն տուգանվելու, իսկ տուգանվելու դեպքում էլ տուգանքը չեն մուծելու իսկական գլխացավ են դարձել կարգապահ հետիոտների եւ մյուս վարորդների համար: Ավտոտեսուչները, մեծ հաշվով անգործության են մատնվել, մթնոլորտը դարձել է այնպիսին, որ անկարգապահ վարորդներն իրենց երկրի տեր են զգում, արդյունքում ճանապարհները վերածվել են փորձության եւ վտանգներով լի մի գոտու:

Կոչով անկարգապահներին խելքի չես բերի: Մնում է գործուն քայլեր իրականացնել իրավիճակը շտկելու համար: Հակառակ դեպքում իրավիճակն ավելի վտանգավոր եւ սարսափելի կդառնա:

Top-News.am