Քաջարի նախարար Արայիկ Հարությունյանի արկածները թիվ 189 դպրոցում

ԿԳ նորանշանակ նախարար Արայիկ Հարությունյանը ոչ միայն պատկերացում չունի, թե որն է իր առաքելությունը նախարարի պաշտոնում, այլ սկսել է ձեւավորել «Պավլիկ Մորոզովի» անվան մատնիչների ջոկատ:

Նա այսօր խրոխտ քայլերով հայտնվեց թիվ 189 դպրոցում եւ վտանգելով իր կյանքն ու առողջությունը, ցուցաբերելով աննախադեպ հերոսություն դրամահավաքի դեպք բացահայտեց։

Փաստորեն մարդիկ օրեր շարունակ հարյուր հազարներով փողոց էին դուրս գալիս, որ հանկարծ ու հանկարծ ավարտական դասարանի աշակերտները վերջին զանգի միջոցառում եւ դրան նվիրված խնջույք չանեն:

1937թ. ոգով եւ շնչով լցված նախարարը հաղորդում է ստացել, որ դրամահավաքի հետ կապված մի աղջկա լացացրել են: Դե, նախարարն էլ նետվեց դպրոց եւ տեղում բռնացրեց չարագործներին: Տարօրինակն այն է, որ գումար հավաքած ծնողներն անմիջապես չաքսորվեցին Ամասիայի բարձրլեռնային գոտիներ, իսկ դասղեկը, ծնողկոմիտեն եւ տնօրենը չդատապարտվեցին մահապատժի:

Առանց ամաչելու նայելով իր տարիքի, իրենից անգամ տարիքով մեծ ծնողների երեսին նորաթուխ նախարարն ասում է՝ ճի՞շտ եք ասում, որ դրամահավաք չկա, իսկ նրանք էլ վախվորած դեմքերով պատասխանում են՝ այոոոո:

Նախորդն ասում էր մենք կրկեսի վերածելու հայրենիք, երկիր չունենք: Իսկապես՝ չունենք: Մի արեք նման զազրելի, էժան, պոպուլիստական քայլեր: Սա ոչ միայն անդուր է, այլ լեցուն վտանգներով:

Պարզվեց, որ ավարտական դասարանի ծնողները երեխաներին տոն պարգեւելու համար որոշել են 15 հազարական դրամ հավաքել: Արայիկ Հարությունյանը ցուցադրելով իր մաթեմատիկական գիտելիքները, ճշտելով, որ դասարանում 29 աշակերտ կա, ասաց՝ ի՞նչ եք անում 450 հազարից 15 հազար հանած գումարը:

Ծնողները չպատասխանեցին, դասղեկը չպատասխանեց: Նրանք միայն ասացին, թե ինչքան հավաքել ենք, բոլորը վերադարձրել ենք:

Ծնողները չասացին՝ մենք ասենք: Արայիկ Հարությունյան, 15 հազարից մոտ ութ հազարը ավարտական խմբանկարի՝ «վինետկայի» վրա է ծախսվում, մոտ երեք հազարը ծաղիկների, փուչիկների, մանր դեկորացիաների, իսկ մնացածը՝ գուցե ավարտական խնջույք-հանդեսի:

Հիմա դուք առաջարկում եք երեխաներից խլե՞լ այդ տոնը: Իսկ եթե դեմ եք դպրոցում դրամահավաքին, ապա հորդորեք կառավարությանը, որ այդ 15 հազարականները պետությունը հատկացնի: Փոխանակ շնորհակալություն հայտնեք ծնողներին՝ իրենց միջոցները ներդնելու համար, դուք «Պավլիկ Մորոզովի» անվան մատնիչների ջոկատներ եք ձեւավորում: Լավ, իսկ հետո՞: Հետո ի՞նչ եք անելու:

Սոֆիկ անունով ներկայացած ծնողներից մեկն էլ, որն արդեն այդ ջոկատի անդամներից է, հարց բարձրացրեց, թե այդ հավաքված գումարից տնօրենին չի հասնելո՞ւ, տնօրենն էլ զարմացավ եւ հայտարարեց, որ իր պաշտոնավարման մեկ տարվա ընթացքում, իրեն նույնիսկ մեկ ծաղիկ չեն տվել։

Ի դեպ, նույն տնօրենը իրեն չկորցրեց եւ Արայիկ Հարությունյանի երեսին ասաց, որ պետությունն անգամ ավարտական քննությունների համար անհրաժեշտ գրիչների եւ տետրերի գումարը չի հատկացնում: Ըստ Արայիկ Հարությունյանի տրամաբանության, երեխաները քննության պետք է առանց գրիչ կամ տետրի ներկայանան:

Պապուլիզմի մրցույթում Արայիկ Հարությունյանն այսօրվա քաջագործությունից հետո առաջ անցավ Սփյուռքի նախարարից, բայց պայքարը դեռ շարունակվում է: Գուցե առաջիկայում առողջապահության նախարարն էլ արգելի վճարել բուժման, վիրահատության համար եւ անակնկալ մտնելով հիվանդանոց դադարեցնի վիրահատությունը, պահանջելով հետ վերադարձնել գումարը:

Տղերք, եթե պատկերացում չունեք, թե ինչով պետք է զբաղվեն նախարարները՝ հարցրեք ավագներից, եթե ուզում եք իմանալ, թե ինչպես են արմատախիլ անում կոռուպցիան եւ բարեփոխումներ անում՝ հարցրեք Սահակաշվիլիին:

Top-News.am